Palasyo nangakong tutulong sa isyu sa USM

NORTH COTABATO, Philippines – Nangako ang Malakanyang na tutugunan nito ang daing ng libu-libong estudyante na naipit dahil sa hindi pagkakasundo ng pangulo ng University of Southern Mindanao (USM) at grupo na nagnanais na mapatalsik siya sa puwesto.

Sinabi ni dating North Cotabato Gov. Emmanuel Piñol, na nagtapos sa USM, na sumagot sa kanya si Pangulong Benigno Aquino III sa kanyang text message nitong Huwebes kung saan humingi siya ng saklolo upang maayos na ang kaguluhan sa paaralan.

Dalawang linggo nang hindi nakakapasok sa paaralan ang mga estudyante ng USM dahil binarikadahan ng mga nagpuprotestang armado ng mga bato, yantok at itak ang gate ng eskuwelahan.

Nais ng grupo na bumaba sa puwesto si USM Presidente Jesus Antonio Derije mula pa noong Enero dahil sa umano’y maling pamumuno at pagwaldas ng pondo ng paaralan.

“Will have this looked into,” sabi ni Piñol, na miyembro ng Liberal Party, base sa kanyang text ni Aquino.