Mahigit 1,000 truck drivers, huli ng MMDA

MANILA, Philippines - Tinatayang mahigit sa isang libong truck dri-vers ang nahuli ng Metropolitan Manila Development Authority (MMDA) matapos lumabag ang mga ito sa ‘‘Uniform Light Trucks Ban’’ sa kanilang anim na araw na operasyon sa kahabaan ng EDSA at Shaw Boulevard.

Kaugnay nito, umabot sa P2.4 milyon ang kinita ng ahensya sa unang linggo ng implementasyon ng truck ban.

Sa report kahapon ng MMDA, simula noong Lunes (Marso 20) hanggang noong Biyernes (Marso 24), nasa 1,234 ng light truck drivers  na ang kanilang nahuli matapos luma­bag ang mga ito sa naturang traffic scheme.

Nabatid, na noong Lunes sinimulang  ipa­tupad ng MMDA ang ‘‘Uniform Light Trucks Ban’’ sa kahabaan ng EDSA at Shaw Boulevard, na nasa hurisdiksiyon ng Mandaluyong at Pasig City. Kung saan simula alas-6:00 ng umaga hanggang alas-10:00 ng umaga at alas-5:00 ng hapon hanggang alas-10:00 ng gabi, bawal dumaan ang mga truck na may kapasidad  na nasa 4,500 kilograms pababa o tinatawag na mga light truck sa kahabaan ng EDSA at Shaw Boulevard simula sa araw ng Lunes hanggang Sabado.

Maaari lamang silang   dumaan sa EDSA at Shaw Boulevard kung araw ng Linggo at holidays. Nasa P2,000 ang multa sa sinu­mang lalabag dito.

Nabatid na ito ay panibagong traffic scheme na ipinatutupad ng MMDA para lumuwag ang kahabaan ng EDSA sa masikip na daloy ng trapiko.

Sa obserbasyon ng MMDA, para sa ka­nila ay naging positibo ang epekto ng naturang traffic scheme, dahil bahagyang nabawasan ang volume ng mga sasakyan na dumadaan dito at kahit papaano ay bahagya ding lumuwag ang daloy ng trapiko.