Awtoridad gibanggaan sa mga dinamitero
CEBU, Philippines – Nasakpan ang siyam ka wala pa mailhing mananagat nga nigamit og dinamita sa pagpangisda sa fish sanctuary sa Sulangan, Bantayan.
Girespondehan sa mga sakop sa Coast Guard kauban ang kapolisan ug Bantay Dagat ang sumbong sa usa ka concerned citizen.
Matud ni PO3 Samuel Aguipo, desk officer sa Bantayan Police Station, nga sakay sa gamay’ng baruto ang mga awtoridad aron dili makugang ang mga mananagat.
Apan sa pagresponde, ilang nasuta nga nagsakay sa dakong motorboat ang mga suspek dayon gibanggaan ang gisakyan sa mga awtoridad hinungdan nga naunlod kini ug wala na sila makagukod.
Nasakmit sa mga awtoridad ang nabilin nga nanglutaw nga mga patay’ng isda nga gituohang kinuha gamit ang dinamita.
Matud ni PO3 Joel Baring, assistant sub-station commander sa Coast Guard Bantayan Sub-Station, nga sagad sa mga mogamit og dinamita mao ang mga taga Mambacayao, usa sa mga isla sa Bantayan, nga nahimutang sa Visayan Sea tunga-tunga sa Negros ug Cebu.
Dugang pa niya nga ang maong dinamita butangan og pabug-at maong adto gyud kini sa ilawom makabuto hinungdan nga maguba gyud ang kagasangan sa fish sanctuary.
“Breeding ground man gud na siya itlogan sa mga isda,” si PO3 Baring niingon. -/GMR (BANAT NEWS)
- Latest
