BOC naglibog sa rice importation deadline

CEBU, Philippines – Naghatag karon og kalibog sa Bureau of Customs ang managlahi nga memorandum order nga giluwatan sa duha ka dagkong opisyal sa maong ahensiya kabahin sa deadline sa Minimum Access Volume sa rice importation.

Ang maong kalibog gumikan sa nagpadayong kontrobersiya sa National Food Authority kabahin sa maong programa sa rice importation.

Si BOC deputy Commissioner Natalio Ecarma niluwat og memorandum niadtong Marso 17 ngadto sa tanang district collectors ug sub-port collectors sa tibuok nasud nga nagpahibalo nga ang extension sa rice shipment nga apil sa MAV, mahuman kini niadtong Marso 31, bisan asa nga nasud gikan.

Apan ang memorandum ni Ecarma nisupak sa giluwatan nga  memoradum order ni Customs Commissoner Nicanor Faeldon niadtong Marso 7 nga nagkanayon nga ang MAV sa tuig 2016 mahuman na sa Pebrero 28, 2017 gawas sa rice shipment nga gikan sa India ug Pakistan nga mahuman sa March 31, 2017.

“Accordingly, rice importation coming from countries other than Pakistan and India should be subjected to seizure by the concerned port,” matud pa ni Faeldon. Si Verne Enciso, ang officer-in-charge sa Customs Intelligence and Investigation Service-Cebu kinsa maoy nirekomendar sa pagsakmit sa P289 milyones nga smuggled rice nga gikan sa Vietnam kay wala kini importation permit gikan sa NFA, nagkanayon  nga iyang gituman ang mando ni Faeldon isip maoy labing dakung opisyal sa BOC. Dugang ni Enciso nga tungod niini, ang mga rice shipment bisan wala’y NFA import permit wala gisikop sa laing dapit sa nasud, gawas sa Cebu. -/DILT (BANAT NEWS)