Patong sa ulo ni Jaime, P150 mil na

CEBU, Philippines – Nanghinaut ang asawa sa napatay nga hepe sa kapolisan sa Lungsod sa Catmon nga sa dili pa mahatod sa lubnganan o sa dili pa ang pagsulod sa Bag-ong Tuig madakpan na ang katapusang suspetsado sa kremin nga si Jaime Jayson.

Si PO3 Queen Brigitte Nuñez, asawa ni PInsp. Alexander Nuñez miingon nga daku ang iyang kalipay kun makuha na sa mga polis si Jaime aron hingpit na nga mahatagan og hustisya ang nahitabo sa iyang bana.

Giangkon niya nga hangtod karon lisod pa kaayo nga dawaton ang nahitabo sa iyang bana ilabina nga nag-edad pa og 6 ug 3 anyos ang ilang anak nga mga lalaki human sila naminyo sulod sa pito ka tuig.

Gusto ni Queen Brigitte nga kun mahimo nga makuha si Jaime aron iya kining mapangutana kun nganong gipatay niini ang iyang bana kinsa igo lang mibadlong sa kagubot.

Sumala pa niya nga wala pa gyud siya nahibalo ug dili pa siya gustong mahibalo sa detalye kun giunsa pagpatay ang iyang bana kay dili pa niya kini madawat. Hinoon daku ang iyang pasalamat sa walay puas nga suporta ug simpatiya sa katawhan nga iyang nadawat.

Daku sab ang iyang pasalamat human kini nakadawat og bulak gikan  kang PNP chief Bato Dela Rosa, DILG Sec. Mike Sueno ug mismo ni Pres. Rodrigo Duterte. Naglaum sab ang biyudang polis nga human aduna nay reward money alang sa makahatag og impormasyon kang Jaime, makapadali kini sa pagsikop sa suspetsado.

Sa pagkakaron niabot na og P150 mil ang reward money ngadto ni Jaime Jayson, diin P100 mil gikan sa Cebu Provincial Police Office  (CPPO) uban ang tampo-tampo sa pipila ka tawo og P50 mil sab gikan sa Police Regional Office-7 (PRO-7). Lakip sa mihatag og salapi ang mayor sa lungsod sa Catmon sa kantidad nga P20 mil.

Si PCSupt. Noli Taliño mikumpirmar nga mohatag ang PRO-7 og P50 mil isip dugang sa reward money.

Kagahapon sa buntag gidala ang lawas sa polis opisyal sa buhatan sa CPPO ug kini gitakda sab nga dalhon sa dakbayan sa Danao karong adlawa hangtod nga kini ilubong karong Enero 7, sa Danao kun asa nagpuyo ang iyang ginikanan ug kini nagdaku. - /DILT) (BANAT NEWS)