Madutlan si Tomas?
Gipatubag na si Mayor Tomas Osmeña sa mga kasong iyang giatubang sa Office of the President.
Gisulatan siya ni acting Deputy Executive Secretary for Legal Affairs Ryan Alvin Acosta aron patubagon sa mga kaso.
Sa pagkahibalo sa media, gipangutana si Tomas sa iyang reaksiyon. Imbes tubagon ang mga kaso, iya na hinuong gipasanginlan si Presidential Assistant for the Visayas Mike Dino nga maoy nagpaluyo sa maong mga kaso.
Matud ni Tomas nga si Dino daan nang mipahibalo nga suportado niya si Bise Mayor Edgardo Labella. Wala gyu’y laing anaa sa hunahuna si Tomas gawas sa politika. Bag-ohay pa lang gani ang eleksiyon, ang sulod sa iyang hunahuna nga gipolitika na siya.
Nganong dili naman lang niya tan-awon ang mga kalapasan sa balaod nga iyang nahimo?
Mao man gud ang nakadaot ni Tomas, kun makalingkod na gani siya sa katungdanan (makabalik pagka-mayor), hunahuna niya nga dili na siya madutlan sa balaod.
Atong sakyan ang pagtuo ni Tomas nga dili kredibleng tawo si Konsehal Pastor Alcover, apan ang gitumbok nga mga kaso klaro man sa mga mata ni bisan kinsa diha sa City Hall.
Mga pasangil ni Alcover nga angay’ng tubagon ni Tomas mao ang pagpanugo sa mga polis nga mopatay og mga drug personalities aron makadawat og reward, pagtudlo sa mga konsehal nga mga deputy mayor, pagtudlo sa iyang asawa nga si Konsehal Margot nga deputy mayor nga matud ni Alcover usa ka nepotism, ug pagmando sa flag ceremony nga himuong ka usa matag bulan na lang.
Si Kapitan Ramil Ayuman misang-at og kaso tungod sa pagpabukas ni Tomas sa Inayawan Sanitary Landfill bisan sa 17 ka kalapasan sa ECC ug pagmando kang DENR Secretary Gina Lopez nga pasirad-an kini.
Gibuhi usab ang kasong pagdawat ni Tomas og Dodge Charger nga awto gikan sa usa ka negosyante. Katapusang kaso nga iyang giatubang mao ang pagpa-operate niya og ilegal nga V-hire terminal sa City Center sa Kamagayan bisan nakalapas kini sa ordinansa nga siya ra pud ang nagpirma. Migawas ra ba ang ngalan ni Jun Pe niining negosyo sa terminal.
Nahibaw-an ra ba nga P170 kada larga sa V-hire ang gipaningil sa siyudad. Siyempre, mohimakak si Tomas kay klaro man kining panikas. Apan kinsa man ang tuohan, ang mga drayber nga maoy nag-ingon ngadto sa kolumnistang si Nestor Ramirez, o si Tomas nga motapion sa mga binuang diha sa terminal?
Kaniadto, isog ra ba kaayo siyang mibarog sa maong terminal. Apan karon mibahar na si Tomas human sa meeting nila ni retired judge Menmen Paredes didto sa City Hall. Human sa maong meeting, gipalutaw na nga ‘experimental’ ra ang maong terminal.
Experimental sa inyong mata!
- Latest