Ang sayop nga pagpili

Para kanako, pilion man sa usa ka eleksiyon o kaha itudlo lang ang mga opisyal nga padumalahon sa usa ka barangay, pareho ra gihapon ang resulta kun dili maayo ang pagkapili.

Kun ipaagi man sa piniliay, tan-awa ang mga kapitan ug konsehal sa inyong barangay kun maayo ba nga moserbisyo. Dili ba kadaghanan kanila nagkangkang lang ang kamot nga modawat sa ilang honorarium?

Nagtrabaho ba gud ang kadaghanan sa maong mga opisyal sa barangay nga inyong gipili? Kun nagtrabaho pa sila ug giprotihian ang katungod sa kinatibuk-ang katawhan, nindot unta kaayo ang inyong barangay.

Apan unsaon, daghang kapitan sa barangay kuwang og pagpakabana sa ilang trabaho. Isip kapitan, sila unta maoy magsilbi nga manager sa barangay, ug ang ilang mga konsehal maoy magsilbi nga division chief.

Isip kapitan, matag karon ug unya iyang sutaon kun ang iyang mga division chiefs nagtrabaho ba base sa gihatag niya nga mga gimbuhaton. Dili ba ang mga konsehal gidestino man isip tsirman sa lainlaing komitiba?

Kun makita sa kapitan nga diha sa iyang barangay daghang suga sa poste ang wala na mosiga kay pundir ang suga, nagpasabot kana nga ang iyang tsirman sa committee on public services wala motrabaho.

Isip kapitan, abtikon unta niya ang iyang mga mata kun unsa pa ang ubang mga gimbuhaton. Kun dili na makaya sa iyang barangay nga giisip nga maoy smallest local government unit, modangop siya sa mayor aron mangayo og tabang.

Nagpasabot nga kun kinsa ang mahimong mayor sa usa ka lungsod o siyudad, angay nila kini nga yukboan. Apan ang nahitabo mao nga ang mga kapitan nagpadayon pagsipsip sa mga kanhi opisyal mao nga misulod na ang pamolitika.

* * *

Karon, ari ta sa isyu kun itudlo lang ang mga ospiyal sa barangay, unya ang presidente maoy mohimo niini pinaagi usab sa pag-abag sa mga mayor ug sa DILG tingali.

Moingon ko nga pareho ra gihapon tingali ang resulta. Sama dinhi sa Dakbayan sa Sugbo, kadaghan sa mga tinudlo ni Mayor Tomas Osmeña sa lainlaing katungdanan sa City Hall nga wala’y maayong serbisyo.

Usa niini kining gitawag og PROBE Team nga gitugyanan unta sa pagpanghawan sa mga aseras o daplin sa karsada aron dili gubot ang atong dakbayan.

Unsaon, ang gitudlo sa mayor, wala man masayod nga ang letter “P” sa PROBE, nagkahulogan og “prevention” unya, wala usab siya masayod nga ang “R” nagkahulogan og “restoration.” Kun makita nga giabusohan ang aseras, ang kasapaan ibalik og unsay ang naandan. Gamita ninyo ang inyong utok.