Nagutman sa bongga nga panihapon!

Nahuman na gyud ang ASEAN Finance Ministers’ meeting 2017 nga gipahigayon sa Dakbayan sa Lapu-Lapu, ug isip pasalamat sa mga media nga nag-cover sa ASEAN meeting, ang Presidential Communications Operations Office nag-organize og media night diin nagdahom ang tanan nga usa kini ka salo-salo sa panihapon, sama niadtong APEC summit nga sa five-star hotel gihimo ang panihapon.

Apan didto man gipahigayon ang ASEAN media night sa usa ka night club sa Barangay Kasambagan, Cebu City. Pagsulod sa mga sakop sa media nahibulong ang tanan kay wala pa may pagkaon nga nakaandam.

Ang sistema diay, ang molingkod sa kada lamesa mag-iyahay og order sa ilang pagkaon. Mga pulotan lang ang ilang giandam, wala gani kan-on o rice man lang. Alas 8 ang schedule sa dinner, apan alas 9:30 na lang sa gabii, usa pa lang ka order ang na-serve nila nga pulos pako sa manok.

Ang among grupo wala na lang magpatugatuga sa paghulat sa order, ug misibat dayon. Mipatalinghog kami sa imbitasyon kay ang venue sa ASEAN media night maagian ra man, apan maayo pa og wala na lang unta kami mihapit.

Dili lang tungod sa kadugay gi-serve ang pagkaon, kun dili, kiwaw kaayo ngano nga didto man sa balay kahilayan gihimo ang kalihukan? Siguro, sa mga wala maanad og night club, dili gyud komportable sa maong dapit. Bati man sab paminawon nga gilingaw-lingaw sa balay kahilayan ang kuwarta nga gikan sa buhis sa katawhan. Sus, pastilan, naay nakahunghong nako nga hilabihan ka dako sa budget sa naasoy’ng media night apan daghan ang napasmo. Mao ra kadto ang bongga kuno nga panihapon nga adunay nagutman!