Pangandam sa ASEAN Summit, 71 nadakpan
CEBU, Philippines - Kapin 70 ka mga tawo ang nasikop sa managlahing police operations apil na sa Oplan Project Double Barrel Reloaded in relation to ASEAN Meet sa kapulisan sa Cebu City Police Office ug Lapu-Lapu City.
Ang tanang onse ka police stations sa Cebu City gimandoan ni Sr. Supt. Joel Doria paglusad og mga operasyon diha sa ilang mga hurisdiksyon batok sa tanang matang sa krimen.
Ang operasyon gipangulohan ni Police Supt. Ryan Devaras nga niresulta sa pagkasikop sa 66 ka tawo ug dili mominos dul-an sa usa ka milyon ka pesos nga balor sa shabu ang nasakmit.
Matud pa ni Police Senior Inspector Narrolf Tan, Deputy sa City Intelligence Branch, 26 sa ilang nadakpan sa buy- bust operations; adunay kaso sa child abuse; 27 tungod sa sugal; walo tungod sa warrant of arrest; usa tungod sa paghupot og kutsilyo; usa ka suspek sa motornapping, usa ka gidudahang kawatan; ug usa ka dunay kasong attempted homicide.
Sumala pa ni Tan, gawas sa mga tawo nga nasikop aduna usab sila’y nakonpiskar nga 79.73 gramos nga shabu nga mobalor og dul-an sa 950mil ka pesos base sa Dangerous Drugs Board Value.
Apil sa ilang nasakmit ang 17 ka mga gambling machines ug mga baraha, ug dul-an P4 mil nga kwarta nga gituohang halin sa drugas.
Samtang sa Lapu-Lapu City, nasikop sa managlahing buy-bust operation sila si Rex Mainit Casinillo alyas Popoy, 38, taga Sitio Paradise, Barangay Pajo sa maong dakbayan.
Nasakmit gikan kaniya ang 53 ka gagmay ug usa ka medium size nga pinaketeng gituohang shabu, ang P300 nga marked money, P850 nga gituohang halin ug usa ka .9mm nga pistola ug lima ka mga bala niini.
Samtang nasikop usab ang laing upat nga gituohang pusher sa Sitio Pool sa Barangay Bankal nga sila si Jeffrey Hiyas Silawan alyas Elaga, 37; Arnold Auguto Malingin, alyas Ano 19; Marlou Casio, 24; ug Jefrey Maglinte Cabilao, 27.
Nasakmit gikan kanila ang 17 ka gamay nga pakete nga gituohang shabu, usa ka medium size nga paketeng gidudahang shabu ug drug paraphernalia. - /EIM) (BANAT NEWS)
- Latest