Cebu Pop Friday “Patience is a Virtue”

Name: Jay-arr Felisilda Librando

Nickname : Jeo

Age: 35

Date of Birth: September 11, 1981

Place of Birth: Cebu City

Favorite Singers: Martin Nievera and Gary Valenciano

Favorite Song: This is the Moment

Kun pagaduyugan nimo og dakong paghigugma ang imong gibuhat, sigurado gyud nga  sa hinay- hinay makab-ot gyud nimo ang tim -os nga kalampusan.

Mao kini ang gipahimug- atan sa padayung pagpanikaysikay sa kalibutan sa musika sa kinabuhi ni Jay-arr Librando o  nailhan usab isip Jeo.

Pagpaambit ni Jeo nga sa dihang nag-edad pa siya og 6 anyos gibuksan na niya ang iyang salabutan sa musika. Sa dihang bata pa siya, mahiligon na gyud siya sa musika,  nahunong lang kini sa makadiyot sa dihang nag tungha na siya sa elementarya.

Subling nahatagan og igong importansya ang iyang paghigugma sa musika sa dihang nisud na siya sa seminaryo.

Mapasigarbuhong gipaambit ni Jeo nga dungan niyang nahatagan og dakong pagtagad ang iyang pagkamahiligun sa musika ug ang iyang dakong paghigugma sa Ginoo tungod kay sa pagka karon anaa na siya sa proseso arun hingpit nang mamahimong pari.

Gani nahimo usab siyang manunuyog sa misa sa seminaryo nga iyang gisudlan kun diin siya usab ang assistant musical director sa pari nga iyang gisilbihan.

Pagpaambit usab niya nga nagsugod gyud siya og himo og kanta sa pagsulod niya sa Blessed John XXIII Seminary sa dihang nahimo siyang usa ka salmista sa Santos nga Misa tungod kay niadtong panahona uso man sa seminary ang pagtagik og ilang kaugalingong kanta uban sa paghatag og kaugalingong tuno niini.

Giangkon ni Jeo nga dili sayon ang pagmugna og kanta sanglit nanginahanglan man kini og dakong pagtagad dungan sa paggahin og dakong oras alang niini.

Apan ang dili mahikalimtan ni Jeo nga kasinatian mao ang pagsalmot niya sa International Eucharistic Congress Songwriting Competition niadtong tuig 2016 kun diin gipasumite sila og mga entry aron unya maoy gamiton nga official theme song sa International Eucharistic Congress.

Tuod man, sa iyang pagsalmot niini, siya ang migawas nga champion niini ug ang iyang gitagik nga "Christ In Us, Our Hope Of Glory" maoy nahimong I. E. C. official theme song nga nabantog dili lang sa Pilipinas apan lukop kalibutan sa panahong gisaulog ang IEC dinhi sa Sugbo nga gisalmotan sa mga nagkadaiyang Romano Katoliko gikan sa mga nagkadaiyang parte sa kalibutan.

Matod niya nga kadiyut ra kaayo siyang naka -compose sa maong awit ug dako ang iyang pagtuo nga ang Espirito Santo maoy nagiya kaniya sa pagtagik sa maong kanta.

Nahimo usab siyang champion sa MSP Songwriting Contest, usa ka kompetisyon mahitungod sa Eucharist ug Liturgy.

Migawas sab siyang grand champion sa 1st Bibliawit niadtung tuig 2016.

Usa sa mga nakahatag og dakong break kaniya sa music industry mao ang pagsalmot niya kaniadto Cebu Pop Music Festival kun makadaghan na siya nga higayon nga nahimong finalist niini.

Niadtung 2007, ang gitagik niyang awit nga "Bahalag Yabag" nga giawit sa mga nagkadaiyang seminarista sa Seminario Mayor de San Carlos maoy nagtukmod niya aron mahimong finalist sa Cebu Pop.

Samtang duha sab niya ka entry ang nakasud sa finals sa Cebu Pop niadtong tuig 2009 ug mao kini ang mga awit nga Tinuohang Buktot nga giawit ni Glenn Tamboboy ug Sulti Paka nga siya ra sab ang nahimong interpreter niini uban si Hubert Tubio Jr.

Ug katapusang nahimo siyang finalist sa Cebu Pop nahitabo niadtong tuig 2013 sa gitagik niyang awit nga Kay Unsa Raman Ako kun diin siya ra usab ang interpreter niini.
Q and A

BNH: Nganung gihigugma nimo ang musika?

Jeo: Tungod kay gihatagan ko sa Ginoo og “talents and skills” isip gasa ug pinaagi niining gasa nga akong nadawat, gihatagan pod ko og higayon nga makapaambit niining gasa ngadto sa uban pinaagi sa akong mga awit. Nahimo kining paagi nga mahiduol ko sa ubang mga tawo.

BNH: Sa imong pagka mahiligon sa musika,unsay gusto nimong i- highlight sa imong kinabuhi kung buhatan ka og istorya niini?

Jeo: Ang akong kadaugan sa IEC ang gusto nako nga i- highlight kay mao kini ang pinaka-memorable para nako, para sa mga Sugbuanon.

BNH: Unsa'y imong ikatambag sa aspiring composers karon?

Jeo: Para sa mga aspiring composers, it’s never too late. Puwede pa kang magsugod og himo og kanta. Walay age limit ang pag-compose. Kun anaa kay nindot nga lyrics ug nindot nga tuno, himoa kining kanta “and see the magic it brings” inig takdo sa titik ug tuno. Kun makahimo naka og kanta, don’t stop writing because it will become a venue for you to express yourself in a song.

BNH: Unsa ang dakong hagit nga imong nasugatan isip usa ka composer?

Jeo: Ang dakong hagit nako isip composer mao ang pagtakdo sa akong estilo sa bag-ong estilo karon.

BNH: Sa tanan nimong gi-compose nga mga kanta, unsay nagmarka gyud nimo?

Jeo: Ang nagmarka gyud nga kanta nako karon mao ang IEC Hymn.

BNH: Unsang panahona ang daghan ka'g ma-compose nga mga kanta?

Jeo: Niadtong 2008, nakahimo ko og usa ka album para sa usa ka orihinal nga musical play, “Kindred Hearts” diin gipahimo ko og napulo’g lima ka mga kanta.

BNH: Giunsa nimo pagpaambit sa imong talent sa religious aspect?

Jeo: Pinaagi sa pagtudlo niini sa mga estudyante, sa simbahan, sa mga church choir, ug sa mga individual nga mga mang-aawit.

BNH: Kinsa'y imong gihimong inspirasyon niining tanan nimong gibuhat isip composer?

Jeo: Ang akong pamilya mismo ang akong inspirasyon sa akong mga hinimong awit.

BNH: Sa unsa nga paagi nakatabang nimo'g dako ang Cebu Pop?

Jeo: Nakapadasig kini nako nga mohimo og daghan pa nga mga awit.

BNH: Kun mahatagan kag kahigayunan sa pag-compose og kanta ug ipaawit sa mga nag- unang singers sa kauluhan, kinsay imong pilion ug unsa nga klaseng kanta ang imong ipaawit kaniya?

Jeo: Ganahan ko nga makanta unta sa akong mga idols nga sila Martin Nievera ug Gary Valenciano akong mga kanta. Tungod kay kasagarang mga kanta nako kay ballads man, igo ra pud nila kay mga balladeer man pod sila.

BNH: May mga panahon ba kaniadto nga hapit na ka moundang sa pag-compose og mga kanta?

Jeo: Niadtong nagtungha ko sa akong katapusang duha ka tuig sa seminaryo, miundang ko sa pag-apil sa mga songwriting competition apan nagpadayon ko’g himo og mga kanta para sa simbahan.

BNH: Unsa ang labing dakong leksyon nga imong nakuha sa imong pagka composer?

Jeo: "Patience is a virtue”. For how many years, wala jud ko makadaug isip champion sa mga -competition, until IEC. Pagka- champion nako sa IEC, nagsunod-sunod na pud ang mga grasya. Nahimo kong champion na pud sa lain pang duha ka mga competition.