Centeno matitikas ang mga makakalaban
MANILA, Philippines - Ipagtatanggol ni Chezka Centeno ang kanyang korona sa prestihiyosong 2017 Amway eSpring International Women 9-Ball Championship na gaganapin sa Taipei Gymnasium sa New Taipei City, Taiwan.
May 40 matitikas na cue masters ang magtatangkang umagaw sa korona ni Centeno na siya ring reigning Southeast Asian Games champion.
Sasabak si Centeno sa Group A kasama sina dating world champion Jasmin Ouschan ng Austria, Kristina Tkach ng Russia at sina Liu Shin-Mei at Wu Hsiao-Wen ng Chinese-Taipei.
Sisimulan ng 17-anyos na si Centeno ang pagdepensa sa titulo sa pakikipagtipan kay Ouschan kasunod ang pagharap kina Tkach, Liu at Wu.
Masisilayan din si two-time Women’s World Ten-Ball champion Rubilen Amit na nasa Group E kasama sina Han Yu ng China, Hsieh Yu-Wen ng Chinese-Taipei, Pia Blaeser ng Germany at Woojin Lee ng South Korea.
Unang sasalang si Amit kontra kay Plaeser kasunod ang paglarga kina Lee, Hsieh at Han.
Ang tatlong mangungunang manlalaro sa bawat grupo ang siyang uusad sa 24-player knockout stage.
Nakalaan ang tumataginting na $93,400 premyo tampok ang $34,000 para sa magkakampeon.
Tutumbok din sina Allison Fisher ng Great Britain, Liu Sha-Sha ng China, Akimi Kajitani ng Japan, Angeline Magdalena Ticoalu ng Indonesia at Wu Zhi-Ting ng Chinese-Taipei (Group B); Chihiro Kawahara ng Japan, Chen Ho-Yun ng Chinese-Taipei, Karen Corr ng Ireland, Claudia Von Rohr ng Switzerland at Fan Yu-Hsuan ng Chinese-Taipei (Group C); at Chow Chieh-Yu ng Chinese-Taipei, Pan Xiao-Ting ng China, Oliwia Czuprynska ng Poland, Molrudee Kasemchaiyanan ng New Zealand at Mou Shu-Feng ng Taiwan (Group D).
Ang iba pang manlalarong kalahok ay sina Natalia Seroshtan ng Russia, Ga-Young Kim ng South Korea, Chen Chia-Han ng Chinese-Taipei.
- Latest