3-peat asinta ng DPS tankers sa PSL 110th National Series

Mahigit 500 tankers ang magbabakbakan upang makahirit ng tiket sa mga international competitions sa gaganaping Philippine Swimming League (PSL) 110th National Series sa Linggo sa Diliman Preparatory School (DPS) swimming pool sa Quezon City.

Mangunguna sa mga raratsada ang DPS swimming team na babanderahan ng veteran international campaigners na sina Lee Grant Cabral, Albert Sermonia II, Paul Christian King Cusing at Paula Carmela Cusing.

“The Philippine Swimming League is beginning to search for talents for international competitions. We have received a lot of invitations this year and we need to identify the swimmer as early as possible,” wika ni PSL President Susan Papa.

Target ng DPS tanker na masungkit ang ikatlong sunod na kampeonato matapos pagharian ang dalawang huling edisyon - 108th at 109th - ng National Series.

“We want to expose our young swimmers to a high-level of competiton. We also have to sustain what we have accomplished last year or better yet surpass it,” dagdag ni Papa.

Paglalabanan ang gintong medalya sa 10 dibisyon - 6-under, 7-year, 8-year, 9-year, 10-year, 11-year, 12-year, 13-year, 14-year at 15-over - sa girls at boys kung saan nakalaan din ang Most Outstanding Swimmer award sa bawat kategorya.

Layunin ng torneong makapili ng mga mahuhusay na tankers na ipadadala sa mga international competitions sa Thailand, Singapore, Japan at Hong Kong bilang bahagi ng grassroots development program ng PSL.

Noong nakaraang taon, humakot ang PSL ng gintong medalya sa iba’t ibang international competitions kabilang na sa star-studded Hamilton Aquatics Winter Long Course 2016 na ginanap sa Dubai, United Arab Emirates kung saan humakot ito ng 21 ginto, 15 pilak at 13 tansong medalya.

Maliban sa mga invitational competitions, pinaghahandaan din ng PSL ang pagsabak nito sa prestihiyosong 29th Summer World University Games na gaganapin sa New Taipei City sa Taiwan sa Agosto.