Ash wednesday ayaw kalimti
CEBU, Philippines - Gipahimangnuan ang mga Katoliko nga dili kalimtan ang ilang obligasyon sa pagtimaan sa Miyerkules sa Badlis kon Ash Wednesday karong adlawa.
Ang Simbahan mopahigayon og oras-oras nga misa aron sa paghatag og kahigayunan sa mga Katoliko sa pag-obserbar sa Miyerkules sa Badlis.
Matud ni Fr. Charles “Cha-Cha” Jayme, ang rehab czar sa Archdiocese of Cebu ug pangulo sa Relief and Rehabilitation Unit, nga ang Miyerkules sa Badlis mao ang panahon aron ang tawo maghinuklog sa pasyon ni Kristo ug sa kamatayon pinaagi sa paghimo og maayong binuhatan ug sa pag-obserbar sa pagpuasa.
Ang Miyerkules sa Badlis nagpahinumdum kini nga ang tawo gikan sa abo ug sa abo mobalik.
Gihimug-atan ni Jayme nga ang pagtimaan sa Miyerkules sa Badlis kinahanglan usab ipahigayon ang “abstinence, fasting and constant prayer.”
Dugang ni Jayme nga adunay mga tawo nga exempted sa mga buluhaton sa Semana Santa ilabi na ang mga bata, mga tiguwang, mga buntis ug masakiton.
Ang pagtimaan sa Miyerkules sa Badlis mao sab ang adlaw nga hingpit nang buksan ang Lenten Season. (BANAT NEWS)
- Latest