Tiyak na magiging maaksyon ang finals series ng SMB at Ginebra
MANILA, Philippines - Kasado na ang bakbakan ng nagdedepensang San Miguel Beer at crowd-favorite na Barangay Ginebra sa 2017 PBA Philippine Cup best-of-seven championship series na magsisimula bukas sa Mall of Asia Arena sa Pasay City.
Umusad sa finals ang Beermen at Gin Kings matapos lusutan ang kani-kanilang best-of-seven semifinal series sa pamamagitan ng parehong 4-3 panalo sa serye.
Pinataob ng SMB ang Talk ’N Text, habang namayani naman ang Ginebra kontra sa Star Hotshots.
Kaya naman prehong mataas ang moral ng dalawang tropa bago sumalang sa kanilang finals series.
Sa kabila ng pagiging sister teams ay tiniyak ni Beermen mentor Leo Austria ang pukpukang labanan na siyang aabangan ng mga tagahanga ng SMB at Ginebra
“I think this series will be tough and very exciting especially for the fans,” ani Austria.
Aminin man o hindi ay liyamado sa serye ang Beermen na nagtataglay ng malakas na lineup sa pangunguna ni reigning Most Valuable Player at Best Player of the Conference top candidate June Mar Fajardo.
Ngunit nilinaw ni Austria na hindi lamang si Fajardo ang bumubuhay sa kanilang tropa dahil malaki rin ang kontribusyon ng iba pang manlalaro gaya nina Arwind Santos, Marcio Lassiter, Alex Cabagnot at Chris Ross.
“June Mar is not the only one. We keep on winning not because of June Mar, but because of his teammates,” ani Austria.
Handa sina Lassiter at Ross na gawin ang lahat upang maipagtanggol ang kanilang titulo.
“We’re happy to be back in the finals. We would be ready for the battle,” wika ni Ross.
“We won’t stop working hard to get this championship,” dagdag naman ni Lassiter.
Nagpahayag din ng kahandaan si Ginebra mentor Tim Cone na muling lumaban upang bigyang kasiyahan ang libu-libong tagasuporta nito.
“We’ll continue to battle for the fans. I believe in our guys, and I hope they find ways to compete with SMB. We found ways to overachieve, and we’re going to continue to find ways to overachieve,” ani Cone.
Para kay Cone, iba ang semis sa finals kaya naman muli itong bubuo ng panibagong plano kung paano pipigilan ang magandang inilalaro ng Beermen.
“Every series is different. Coach Leo has a great team. It takes a special kind of guy to handle that kind of team,” ani Cone.
Aminado sina LA Tenorio at Scottie Thompson na mahirap kalabanin ang Beermen ngunit determinado ang kanilang koponan na bigyan ng magandang serye ang SMB at ang mga fans.
“Magandang series to, mag-e-enjoy lahat. Chris is a tough match-up. To be honest, pag-aaralan pa namin. We’ll be ready,” ani Tenorio.
“Sobrang tough nitong series na to, ibibigay namin ang best namin,” bahagi ni Thompson.
Lalaruin ang Game One sa alas-7 ng gabi kasunod ang Game Two sa Lucena City sa Linggo.
Nakatakda ang Game Three sa Marso 1 at Game Four sa Marso 3 na parehong lalaruin sa Smart Araneta Coliseum.
Sakaling umabot sa rubber match ang serye ay idaraos ang Game Five sa Marso 5 sa Big Dome kasunod ang Game Six sa Marso 8 sa MOA Arena at Game Seven sa Marso 10 balik sa Big Dome.
- Latest