Walang magiging problema sa 2023 FIBA World Cup-- SBP

MANILA, Philippines – Kasama sa joint bid ng Pilipinas at Indonesia para sa pamamahala sa 2023 FIBA World Cup ay ang pagtiyak na walang magiging problema sa trapiko pagdating sa Finals ng torneo na pina-planong gawin sa 55,000-seat Philippine Arena sa Bulacan.

Sinabi ni SBP executive director Sonny Barrios na nagsumite na ang SBP noong Miyerkules ng isang accomplished form bilang pre-qualifying requirement sa pagbi-bid para sa hosting rights.

Sa naturang liham, nakasaad ang pakikipagtulungan ng Pilipinas sa Indonesia.

Ang Pilipinas at Indonesia ay kabilang sa FIBA Central Board na may 24 miyembro, kasama ang presidente nitong sina Horacio Muratore ng Argentina at secretary-general Patrick Baumann ng Switzerland.

Ang mga miyembro naman ng Asia/Oceania sa FIBA Central Board ay sina SBP chairman emeritus Manny V. Pangilinan ng Pilipinas, SEABA president Erick Thohir ng Indonesia, Sheikh Saud Bin Ali Al-Thani ng Qatar, Scott Derwin ng Australia at Burton Shipley ng New Zealand.

Sa bagong configuration ng FIBA zones ay pinagsama ang Asia at Oceania na kakatawanin ng pitong qualifiers para sa 32-team 2019 FIBA World Cup sa China.

Inaasahan ni Barrios na tatanungin ang traffic conditions sa Metro Manila patungo sa Philippine Arena sa Bulacan.

“We’ve assured FIBA that there is infrastructure in the pipeline to address the traffic problem,” ani Barrios.  “For instance, by 2023, we expect an exit from the North Luzon Expressway directly to the Philippine Arena.  There are other infrastructure plans we expect to be operational by 2023.  Of course, we’ll remind FIBA that NLEX is managed by the MVP Group.  Aside from infrastructure, we also told FIBA that as in the previous FIBA competitions we’ve hosted, we will provide motorcycle escorts for the team buses and FIBA officials.  We will be coordinating closely with local government units to clear routes.  So we don’t expect traffic to be a problem at all.”

Nagpahayag ng kanilang interest na pamahalaan ang 2023 edition  ang Argentina, Uruguay, Australia, Germany, Hong Kong, Israel, Japan, Philippines, Poland, Russia, Serbia, Turkey at Qatar.