Inabogado ni del Mar diha sa MCIAA Board

Bantayanan ang balaudnon nga giduso ni Kongresista Raul del Mar ngadto sa Kongreso aron pag-amendar sa Akta Republika 6958, ang corporate charter sa Mactan Cebu International Airport Authority.

Ang balaudnon ni del Mar buot nga moklaro nga ang tanang appointed directors sa MCIAA kinahanglang residente sa cities ug probinsiya sa Sugbo sulod sa tulo ka tuig sa dili pa siya i-appoint (“all the appointed directors and officers of MCIAA must have been a resident of the cities of Cebu or province of Cebu for at least three years preceding the day of their appointment”).

Nabalaka ang mga taga-Lapu-Lapu City niining balaodnon ni del Mar tungod kay wala kini klaro.

Gawas nga walay klaro, para kanako, tataw kini nga pagbabag sa hingpit pinaagi sa balaod nga mahatagan og lingkoranan sa MCIAA Board ang kagamhanan sa siyudad sa Lapu-Lapu nga dugay na nga gipangayo.

Nabantayan sa mga taga-Lapu-Lapu nga ang balaodnon ni del Mar nangayo nga ang tanang “appointed directors” lumolupyo sa mga siyudad “or” probinsiya sa Sugbo. Sa ato pa, ang mga siyudad nga dili sakop sa probinsiya sa Sugbo kuyaw dili makaapil isip representante sa MCIAA Board.

Sa laktod pagka-estorya, “inabogado” kining kang del Mar. Kun kinsay iyang gipangabogaran sa paghingpit nga ma-isolate ang kagamhanan sa Lapu-Lapu sa MCIAA Board, maayong ang mga tawo ang moila niini. Wala koy laing mapasanginlan niini gawas sa politika. Si del Mar usa ka tang-an nga politiko. Kun unsa siya katang-an pagpanday og balaod, ug pagka-abogado, ingon usab siya katang-an isip politiko.

Apan ning panahona, lisod na mailad ang mga tawo pinaagi sa tuyoktuyok sa provision sa balaod, simbako mapasar ang House Bill No. 687 ni del Mar.

Dugay na nga suportado sa mga Sugboanon ang ideya nga mahatagan na og representasyon ang dakbayan sa Lapu-Lapu sa MCIAA Board. Busa kun aduna may mga lakang pagbabag niini angayan nga pagatawgon og “anti-Cebuano.”

Sukad niadtong tungatunga sa 1960s natukod ang airport sa isla sa Mactan gikan sa naandan nga Mactan Air Base sa mga sundalong Amerikano. Kini, human gisibog ang karaang Lahug Airport sa lugar diin nagbarug karon ang malambuong IT Park.

Apan sukad natukod ang MCIAA pinaagi sa Akta Republika 6958 niadtong Hulyo 31, 1990 ug nagsugod og operate sa luna sa dakbayan sa Lapu-Lapu niadtong Disyembre 18, 1990, walay bisan usa lang ka representasyon ang kagamhanan sa dakbayan sa Lapu-Lapu sa MCIA Board.

Dili ba kataw-anan?  Dili ba makaluluoy ang dakbayan sa Lapu-Lapu?

Pananglit adunay mga polisiya nga ipasar ang MCIAA Board unya taliwas sa polisiya sa dakbayan sa Lapu-Lapu isip host city, unsaon man na pag-settle kun walay representasyon ang Lapu-Lapu?

Usa pa, nganong interesado man kaayo si del Mar sa MCIAA nga taga-siyudad sa Sugbo man siya. Unya kuhaan niya og ka buot ang kongresista sa lone district sa Lapu-Lapu?

Busa, bantayi ninyo ang inabogado ug pamolitika ni del Mar gamit ang MCIAA.