Barriga umakyat na sa pro boxing

MANILA, Philippines - Marahil ay wala nang pag-asang nakikita si amateur boxer Mark Anthony Barriga na masuntok ang kauna-unahang gold medal ng Pilipinas sa Olympic Games.

Kaya naman nagdesis-yon ang 22-anyos na si Barriga na umalis sa  Association of Boxing Alliances of the Philippines (ABAP) para lumaban sa professional ranks.

Nakatakdang harapin ng tubong Panabo, Davao del Norte si Mark Anthony Florida (9-6-0, 7 knockouts) sa isang 8-round bout sa minimumweight (105 pounds) division sa Hun-yo 18 sa Philippine Navy Gym sa Taguig City.

Naging matagumpay ang amateur career ng 5-foot-2 na si Barriga na tinampukan niya bilang nag-iisang Filipino boxer na lumaban noong 2012 Olympics sa London.

Nakapasok si Barriga, isang corporal sa Philippine Air Force, sa second round ng London Olympics bago natalo kay Birzhan Zhakypov ng Kazakhstan.

Bago ito ay umabante si Barriga sa third round ng 2011 AIBA World Championships matapos talunin si two-time Olympic bronze medalist Paddy Barnes ng Ireland bago yumukod kay two-time gold medalist Zou Shiming, isa na ring professional boxer na hinahawakan ngayon ng batikang trainer na si Freddie Roach.

Matapos ang 2012 Olympics ay sumabak naman si Barriga sa 2013 Southeast Asian Games kung saan nag-uwi siya ng gintong medalya.

Noong 2014 Asian Games sa Incheon, Korea ay nakasuntok siya ng bronze medal.

Si Rogen Ladon  ang kumuha sa puwesto ni Barriga para sa darating na 2016 Olympics sa Rio de Janeiro, Brazil sa Agosto.