Mahigit 100 biktima ng rent-tangay, lumutang sa NBI
MANILA, Philippines - Nakikipag-ugnayan na sa National Bureau of Investigation (NBI) ang mga may-ari ng mahigit 100 mga sasakyan para mabawi ito sa sindikato ng ‘Rent Tangay’ Sangla Scam’.
Sa kabuuan, umaabot na sa 256 ang mga sasakyan na nabawi ng NBI at ang mga ito ay nasa tanggapan ng kawanihan sa Tagaytay City.
Sa pulong balitaan, inanunsyo ni NBI Director Dante Gierran na inatasan na niya ang NBI NCR para pangunahan ang imbestigasyon at pagbuo ng malakas na kaso laban sa mga sangkot sa nasabing sindikato.
Lumiham na rin aniya ang NBI kay Justice Secretary Vitaliano Aguirre para masimulan na ang pagbalik sa mga sasakyan sa mga may-ari nito.
Sinabi naman ni NBI-NCR Chief Cesar Bacani na magiging mabusisi sila sa proseso ng pagbalik sa mga sasakyan.
Kinakailangan aniya na ang claimant ay makapagprisinta ng proof of ownership para maibalik sa kanila ang sasakyan.
Samantala, nasa 72 na mga may-ari ng sasakyan ang dumulog na sa NBI para magreklamo.
Hindi rin isinasantabi ng NBI ang posibilidad na maisama nila sa imbestigasyon ang posibleng pagkakasangkot ng mga ahente sa bangko sa nasabing modus operandi.
- Latest