P2-B winasak ni ‘Lawin’ sa 4 rehiyon

MANILA, Philippines – Umaabot umano sa mahigit sa P2 bilyon ang halaga ng mga sinirang imprastraktura at agrikultura sa apat na rehiyon sa Northern Luzon ng bagyong Lawin.

Sa ulat ng National Disaster Risk Reduction and Management Council (NDRRMC) ang winasak ng supertyphoon na imprastraktura ay nagtala ng P1,402,245,000 at sa agrikultura naman ay nasa P645,515,777.90.

Ang mga rehiyong ito ay kinabibilangan ng Ilocos, Cagayan Valley, Central Luzon at Cordillera Administrative  Region (CAR).

Naipaabot na ng Department of Social Welfare and Development ang kanilang tulong sa mga apektadong mga pamilya.

Nabatid na nasa kabuuang 48,521 na mga pamilya o 228,695 katao ang inilakas bunga ng nasabing supertyphoon at nasabing bilang ang 18,425 pamilya o 75,408 katao ang nanatili pa sa may 552 mga evacuation center.