Sa Piling ng Kalapati (62)
“HINDI kaya ang lalaking naghahanap sa’yo ay si Toshi – baka sinundan ka, Mommy,” sabi ni Ruth.
Mapakla ang mukha ni Mommy Donna.
“Hindi! Palagay ko, wala nang interes sa akin ang demonyong yun! At maski ako naman, wala na ring damdamin sa kanya. Sinira niya ang buhay ko. Kung hindi niya ako inapi-api, hindi ako masasadlak sa ganitong buhay.’’
Nakumbinsi si Ruth. Tama si Mommy Donna, ang walanghiyang Hapones ang may kagagawan nang lahat. Kung hindi siya pinauwi mula Japan, hindi sana magiging ganito ang buhay ni Mommy Donna. Siguro rin ay hindi mamamatay ang anak nilang si Keiko. Pero sabi naman ni Mommy Donna, malakas ang kutob niyang buhay si Keiko.
“Kung hindi si Toshi ay sino ang Hapones na naghahanap sa’yo, Mommy?’’
“Baka isang “naserbisyuhan” ko at hindi malimutan ang nangyari.’’
Hindi nagsalita si Ruth. Naalala niya ang mga latay noon ni Mama Donna sa likod. Kagagawan daw iyon ng isang Hapones na hindi nasisiyahan sa pakikipagtalik hangga’t hindi sinasaktan ang partner. Matagal-tagal din bago gumaling ang mga latay sa likod ni Mommy Donna. Nagsugat kasi dahil laging nakikiskis ng damit. Naimpeksiyon yata kaya matagal bago bumahaw ang sugat.
PERO sa kabila na hindi naniniwala si Mommy Donna na ang naghahanap sa kanya ay si Toshi, may nabubuhay na pag-asa na baka nga ang asawang Japanese iyon.
Hinanap niya ang tambay na si Danilo. Nakita niya sa kanto.
“May naghahanap pa ba sa akin, Danilo?’’
“Wala Mam Donna!”
“Baka hindi ako ang hinahanap nun.’’
“Ikaw daw po, Mam.”
(Itutuloy)
- Latest
