Nunal (73)

TUMAWID sa Recto  Ave­nue ang lalaki na kaha- wig ni Nesto. Si Nesto ang waiter sa Pugad Uwak KTV club sa Pasay na dating pinagsayawan ni Mahinhin alyas Bianca. Mabilis na sinundan ni Robert. Sigurado siya na si Nesto ang lalaki.

‘‘Nesto! Nesto!’’ Tawag ni Robert. Patungo sa LRT Carriedo ang lalaking sinusudan.

Lumingon ang lalaki.

Si Nesto nga! Hindi siya nagkamali.

Tumigil si Nesto at tinitigan si Robert. Sinisigurado kung si Robert nga ang tumawag sa kanya.

“Boss Robert? ’’ Sabi nito na parang nag-aalinlangan pa.

‘‘Ako nga Nesto.’’

‘‘Hindi kita nakilala Sir Robert, bumata ka kasi at pomogi lalo.’’

“Wow, talaga ha?’’

“Totoo Sir Robert siguro maligaya ka sa buhay.’’

“Hindi pa gaano, ha-ha-ha! Halika at magmeryen-da muna tayo. Hindi ka ba nagmamadali?’’

“Hindi naman Sir.’’

Tinungo nila ang fast food chain.

Naghanap sila nang ma­uupuan. Nang maka­ki­ta, si Robert na ang umorder. Pagkaorder, nagbalik na siya sa mesa nila ni Nesto.

‘‘Sarado na pala ang Pugad Uwak, Nesto. Galing ako roon. Ba’t isinara?’’

“Malaking istorya Sir. Yung may-aring Intsik drug lord pala at nasa listahan ng PDEA. Tinutugis na siya. Yung Tsekwa pala ang source ng shabu dito sa Metro Manila. Galing China ang shabu at pina­dadaan sa Customs. Sinusuhulan ang mga korap doon. Kontrolado niya ang Customs. At alam mo ang natuklasan sa Pugad Uwak, kaya pala ganun ka-wild ang mga dancers doon e pinagsa-shabu ni Tsekwa.’’

Napamaang si Robert. Nagpatuloy si Nesto sa pagkukuwento.

“Nang ni-raid ang Pugad Uwak huling-huli ang mga dancer na nag-sa-shabu. Matagal na palang ginagawa iyon sa Pugad Uwak.’’

 “Kahit noong dancer pa roon si Bianca, Nesto?”

Napatango si Nesto.

(Itutuloy)