Nunal (44)
“DUMATING na si Ate!’’ sabi ni Bighani kay Robert.
“Baka magalit ang Ate mo Bighani. Pinatuloy mo ako rito kahit wala kang kasama.’’
“Okey lang yun. Mabait naman si Ate.’’
Tumayo si Bighani para salubungin ang kapatid sa pinto.
Nanatili namang nakaupo si Robert at nag-iisip. Mabait nga kaya ang kapatid ni Bighani? Sabagay, wala naman siyang ginagawang masama. Ano kaya ang itsura ng ate ni Bighani. Siya kaya ang kasama ni Bighani na naligo noon sa Ilog Pola? Hindi niya nakita ang mukha nina Bighani noon pero tiyak niya na ang mga ito ang naligo noon.
Halos mapanganga si Robert nang makita ang ate ni Bighani. Shock siya sa nakita. Ang ate ni Bighani ay si Bianca --- ang babaing hinahanap niya noon pa! Hindi siya maaaring magkamali. Ang babaing ito ang dancer sa Pugad Uwak KTV bar sa Pasay. Star dancer si Bianca.
Ipinakilala siya ni Bighani.
“Ate Hinhin, si Robert.”
“Hi Robert.’’
“Hi Hinhin.’’
“Pinagmeryenda mo ba siya Bighani?’’
“Huwag na. Aalis na rin naman ako. Nagpasalamat lang ako kay Bighani dahil sa tulong.’’
“Magmeryenda ka muna. Bighani bigyan mo siya ng puto at kutsinta. Magbibihis lang ako.’’
“Oo Ate Hinhin.’’
Pumasok na sa kuwarto si Hinhin.
Sinundan ng tingin ni Robert. Hindi siya maaaring magkamali, si Bianca at si Hinhin ay iisa.
Pinakain siya ni Bighani ng puto.
“Mabait pala ang Ate mo, Bighani.’’
“Oo.’’
“Ano ang pangalan niya?’’
“Mahinhin.’’
(Itutuloy)
- Latest
