Nunal (21)
NAGBALIK uli si Robert sa Miguelin St. at nagbakasakaling may mapagtatanungan siya ukol kay Bianca. Kahit sa isip niya ay mahirap nang hanapin doon si Bianca, nanaig pa rin ang pagnanais na baka may isang taong magturo sa kanya. At sino ang makapagsasabi, baka masalubong niya ang babaing matagal na ring umaagaw ng kanyang panahon. Lahat ay gagawin niya kahit pa para siyang loko-loko na naghahanap sa babaing hindi naman siya kilala.
Umaga siya nagsimulang magtanong sa mga nakatira sa Miguelin. Natatandaan naman niya ang bahay na pinagtanungan niya noon kaya iniwasan na niya ang mga iyon. Baka maulit lamang ang nangyari noong una siyang magtungo rito na binara-bara siya. Mayroon pang babaing pinagmura-mura siya at may lalaking pilosopo na siya pa ang pinagalitan. Kapag nakita niya muli ang mga taong nakausap noon, iiwasan na niya.
Awa ng Diyos, natapos ang kanyang pagtatanong at wala namang nagmura o namilosopo pero wala rin siyang nakuhang inpormasyon na makakapagturo sa kinaroroonan ni Bianca Nunal.
At gaya nang dati, umuwi siyang bagsak ang balikat.
MAKARAAN ang isang buwan, muli siyang dumalaw sa Pugad-Uwak KTV bar. Magbabakasakali uli siya.
Hindi pa nag-iinit ang kanyang puwit ay nilapitan siya ng waiter na si Nesto. Tuwang-tuwa ito nang makita.
“Sabi ko na’t dadalaw ka Sir Robert. Noon pa kita hinihintay.’’
“Ano ang balita, Nesto?’’
“May info ako kung saan makikita si Bianca.’’
Biglang sumaya ang mukha ni Robert.
(Itutuloy)
- Latest