Nunal (16)
IPINASYA ni Robert na hanapin si Bianca. Paninindigan na niya ang ginagawa --- kabaliwan man ito – o kahit may magsabing engot siya. Wala naman siyang piniperwisyong ibang tao. Basta gusto niyang makilala si Bianca na may nunal sa likod ng hita. Gusto niyang malaman kung ano ang kahulugan ng nunal na nasa likod ng hita. Maaaring hindi nagkakalayo ang kahulugan nito sa nunal na nasa likod ng tuhod.
Naalala ni Robert ang sinabi ni Jinkee na nakatira umano si Bianca sa Miguelin. Hindi niya alam kung nasaan ang Miguelin.
Ipinasya niyang mag-research gamit ang google.
Lumutang ang Miguelin St. sa Sampaloc, Manila. Kalye pala ito. Ngayon lang niya nalaman. Mahaba ang kalye na nagmumula sa may Dimasalang St. at Simon St. at nagtatapos sa may Fajardo St.
Pinlano ni Robert ang paghahanap kay Bianca. Kahit gaano kahaba ang Miguelin St. ay susubukan niya. Nasimulan na rin lang niyang maghanap ng info kay Bianca kaya itutuloy na niya. Titingnan niya kung ano ang kalalabasan ng kanyang “kabaliwan”.
Kinabukasan, nagsimula na siya. Hindi na siya nagdala ng kotse dahil hindi niya kabisado ang hinahanap. Isa pa, kailangang magtanung-tanong siya kung may nakakakilala kay Bianca.
Sinimulan niya ang paghahanap sa may Fajardo St. Maliit na kalye lang ang Miguelin. Isang sasakyan lang ang kasya.
Unang napagtanungan niya ay isang matandang babae.
“May kilala ka po bang Bianca rito?’’
“Wala.’’
Lakad siya. Nagtanong uli sa nakasalubong na lalaki. Wala ring kilalang Bianca.
Isang may edad na lalaki na nakaupo sa may tindahan ang nilapitan.
“May kilala ka po bang Bianca rito, Manong?’’
“Wala. Baka roon.’’
Lakad uli siya.
Para siyang loko-loko na naghahanap ng karayom sa dayami.
(Itutuloy)
- Latest