Damo sa Pilapil (72)
“AT eto pa ang ikinahahanga ko sa’yo Zac, sa kabila na maaari mong hingin ang tulong ng may-ari ng kompanyang ito para mabilis kang ma-promote, wala kang ginawang ganun. I know, si Dulce, ang nagpasok sa’yo rito bilang messenger at sa kabila niyon hindi ka nagpakita ng kaangasan. Hindi mo ginamit ang impluwensiya at hangang-hanga ako sa’yo. Bihira akong humanga pero sa pagkakataong ito, talagang sasabihin ko na kahanga-hanga ka Zac.’’
“Marami pong salamat uli Sir. Sobra-sobra na po ang papuri mo.’’
‘‘Dapat ka lang purihin, Zac.’’
‘‘Lalo ko pa pong pagbubutihin ang paglilingkod at nang umunlad pa ang kompanya natin.’’
“Ganyan nga Zac. Matatanda na kaming mga bossing dito at ang mga kabataan na katulad mo ang inaasahan namin na magpapatuloy ng mga nasimulan. At alam ko, kayang-kaya mo ito. Good luck, Zac.’’
“Salamat po uli, Sir.’’
Mahigpit siyang kinamayan ng bossing.
ISANG umaga na maagang pumasok si Zac, nasalubong niya si Manong janitor. Tuwang-tuwa ang matanda. Alam na niya na na-promote na si Zac.
‘‘Congratulations, Zac! Sabi ko na nga ba’t ikaw na ang magiging manager. Napakasaya ko Zac!’’
“Salamat po Manong.’’
Nasa ganun silang sitwasyon nang biglang dumaan ang superbisor na “mainit” ang dugo kay Zac.
Bumulong si Manong kay Zac.
“Zac, eto na ang mayabang na bisor. Batukan ko kaya!’’
(Itutuloy)
- Latest