Pag-uli sa luna sa SRP giproseso na
CEBU, Philippines - Nagsugod na og proseso ang kagamhanan sa Siyudad sa Sugbo ug ang mga opisyal sa Filinvest Land Inc. (FLI) alang sa mga legal nga pamaagi aron hingpit nga makanselar ang kontrata sa pagbaligya sa 19 ektarya nga yuta sa South Road Properties (SRP).
Gibutyag kini ni Mayor Tomas Osmeña human sila magkasinabot sa opisyales sa FLI nga iuli ang yuta sa dakbayan ug iuli sab sa siyudad ang kwarta nga gibayad sa FLI nga mokabat sa P4 bilyones ngadto sa P5 bilyones.
Matud ni Osmeña nga humanon nila ang tanang legal nga proseso apil na ang diskusyon sa pag-refund sulod sa 30 ka adlaw.
Sa isyu nga kinahanglang aprubahan kini sa konseho una ma-revoke ang kontrata, matud ni Osmeña nga magdepende kini sa sitwasyon.
Gani, dugang sa mayor nga usa kini sa ilang hisgutan sa opisyales sa siyudad ug sa FLI.
Andam usab si Osmeña nga motubag sa mga pangutana unya sa mga sakop sa konseho sa insaktong panahon ug dili pa karong panahona.
Matud niya nga gihuna-huna ra niya ang benepisyong makuha sa siyudad tungod sa pag-uli sa FLI sa 19.2 ka ektaryang luna nga nahimutang atubangan sa Pond A nga adunay 60 ka ektarya.
Dugang niya nga iyang ibutyag unya ang plano sa maong luna sa sunod nga mga adlaw.
Kahinumduman nga nakadesisyon ang FLI nga iuli ang yuta sa dakbayan ug bakwion ang kwarta human wala matuman sa siyudad ang paghatag og mga legal nga dokumento lakip na ang titulo sa yuta ug uban pa. (BANAT NEWS)
- Latest