Salome (146)

NAGISING si Sir Hector sa kalabit at tawag ni Mam Pilar.

“Hector! Hector!’’

Pumungas-pungas si Sir Hector. Akala niya’y nananaginip siya. Hindi niya malaman kung nasaan siya. Nakalimot siya.

“Ba’t diyan ka natulog? Hintay ako nang hintay sa’yo kagabi.’’

“Antok na antok kasi ako. Dito na ako natulog.’’

“Saan ka ba nangga­ling? Napanis na ako sa kahihintay sa’yo.’’

“Uminom nang kaunti.’’

“Kaunti bang nainom mo e bakit hindi ka na nakarating sa kuwarto. Nasa kuwarto ako at naghihintay.’’

“Sorry, talagang antok na antok ako, Pilar.’’

“Lasing ka nga kaya hindi ka na nakarating sa kuwarto.’’

“Kaunti lang.’’

Nang biglang may maalala si Sir Hector.

“Parang hindi ko nakita kagabi ang Chedcng. Wala sa harapan. Hindi ka ba umalis?’’

“Hindi! Ba’t naman ako aalis?’’

“Kasi nga’y wala ang sasakyan.’’

“Lasing ka na nga, ha-ha-ha!’’

“Hindi nga ako lasing.’’

‘‘E nasa harapan ang Chedeng kagabi. Hindi naman inaalis ni Jeff dun.’’

Nag-isip si Sir Hector. Parang duda nga siya kung naroon o wala ang Chedeng. Inalala niyang mabuti.

‘‘Hindi mo lang nakita dahil nga lasing ka. Grabe na talaga ‘to.’’

“Pero sa harap ako nagdaan at wala akong nakita.’’

“Naroon nga ang Che­deng kagabi. Gusto mo tawagin ko si Jeff.’’

“Huwag na! Baka nga dahil sa sobrang antok ko kaya hindi ko nakita ang Chedeng.’’

“E teka bakit ka naman uminom ng alak. Hindi ka naman umiinom dati.’’

Napahinga nang malalim si Sir Hector.

‘‘Wala !’’

‘‘Anong wala? Hindi ka iinom ng alak nang walang dahilan. Ano nga ang dahilan?’’

Napilitan si Sir Hector.

‘‘Mayroon kasing sinabi si Mac sa akin…tungkol sa...’’

Sasabihin na sana ni Sir Hector ang mga sinabi ni Mac nang biglang tawagin ni Rocco si Mam Pilar.

‘‘Mama, may sasabihin ako sa’yo! Mag-usap tayo!’’ Mukhang galit ang boses ni Rocco.

‘‘Sandali!’’

‘‘Ngayon na ‘Ma! Mahalaga ito!’’

Inis si Mam Pilar.

‘‘Mamaya na tayo mag-usap, Hector. Haharapin ko muna ang Rocco na ito.’’

Umalis si Mam Pilar.

Natigilan naman si Sir Hector. Nag-isip. Bakit ba niya sasabihin kay Pilar ang mga sinabi ni Mac? Paano kung totoo ang sinabi ni Mac?

(Itutuloy)