Salome (49)
“NASAAN si Rocco, Amy?’’ Tanong ni Salome habang naglalakad sila pauwi. Gusto niyang matiyak kung nasa gate pa ito sa pagdaan nila roon.
“Nasa gate nag-aabang. Mukhang uhaw na uhaw sa beer. Ikaw nga ang hinahanap kanina at pabibilhin pero si Manang Sabel ang nagsabi na mayroon ka lang pinuntahan. Mukhang alam na ni Manang ang gagawin…’’
“Kasi’y nag-aalala si Manang dahil baka kung ano ang gawin sa akin.’’
Nagtawa si Amy.
Nagtaka naman si Salome.
“Ba’t ka nagtawa?’’ tanong nito.
“Ano namang gagawin sa’yo ni Rocco?’’
“Kasi’y kung makatingin e parang may iniisip na masama.’’
“Bakit mo nasabi?’’
“Nung minsan ay nilapitan niya ako habang naggagamas sa punong santol at sinabi sa akin na magkuwentuhan daw kami. Itigil ko raw ang ginagawa ko. Natakot ako kaya sumunod sa kanya. Nakipagkuwentuhan ako sa kanya sa may punong santol.’’
“Dun ba yun sa malaking puno ng santol na maaaring sandalan?’’
“Oo. Bakit mo naitanong?’’
Hindi sumagot si Amy. Hindi na niya sasabihin na dun sa punong santol na iyon nag-shabu si Rocco. Kitang-kita niya kung paano nilanghap ni Rocco ang usok sa foil. Sa puno sumandal si Rocco at parang sarap na sarap sa posisyon.
“Ba’t mo naitanong Amy?’’
“Wala! Bilisan natin at baka inip na si Rocco. Humanda ka na lang kapag tinanong ka. Masamang magalit yun.’’
Kinabahan si Salome. Tinakot pa siya ni Amy. Ano kayang magandang gawin?
Nang malapit na sila sa bahay, natanaw nila si Rocco na nag-aabang pa sa gate.
“Naroon pa si Rocco! Humanda ka, Salome.”
Biglang kinuha ni Salome ang cell phone niya at tinawagan si Manang Sabel.
Nagtaka si Amy kung sino ang tinatawagan ni Salome.
“Sinong tinatawagan mo?’’
“Si Manang Sabel. May itatanong lang ako.”
(Itutuloy)
- Latest
