Black Widow (37)
KUNG anu-ano na naman ang naisip ni Marie na nangyari kay Jam kaya absent na naman ito. Nabisto na kaya siya ng mga anak na may karelasyon siya? O nahuli na siya ng mister na may lalaki? Sabagay kung nahuli siya ng kanyang mister na may lalaki, mas gusto nga niya iyon dahil naipamukha niya na kaya rin niyang gumawa nang ganoon at nakaganti na siya. O baka naman nagsasama na siya at ang lalaki. Sa huling pag-uusap nila, parang gusto nang makisama ni Jam kay Coco, ang dancer sa KAYUMANGGING IBON. Na-inlab na siya sa dancer na malaki ang agwat ng edad sa kanya. Mahigit lang 20 si Coco ayon kay Jam. Baka nga nagsasama na sila.
Napahinga nang malalim si Marie. Tiyak na siya na naman ang tatanungin ng kanyang boss kapag nakitang wala na naman si Jam. Palibhasa’y siya ang tanging kaibigan ni Jam kaya siya ang laging tinatanong.
Kinabukasan, wala pa rin si Jam. At tama ang hula niya na siya ang tatanungin kung bakit wala ito.
Ang mismong boss ang kumausap sa kanya. Pinatawag siya sa opisina nito.
“Alam mo ba kung bakit wala si Jam, Marie? Mag-iisang linggo na siyang absent at walang notice. Paki-message mo siya at baka mapansin na siya ng HR e tuluyan na siyang sibakin. Ayaw kong mangyari sa kanya iyon, kaya please ikaw na ang bahalang kumausap.’’
“Yes Sir. Pupuntahan ko na po siya bukas sa bahay niya.’’
“Please Marie. Sayang naman kung mawawalan siya ng work.’’
“Opo Sir.’’
KINABUKASAN, Sabado, pinuntahan ni Marie si Jam sa bahay nito. Kailangang maipaalam niya rito ang sinabi ng kanilang boss.
Nang makarating sa bahay ni Jam, nagtaka si Marie dahil parang inabandona na ang bahay. Saradung-sarado. Nang tanawin niya ang may pintuan ay maraming laglag na dahon at mga papel. Ibig sabihin niyon, walang naglilinis. Wala ngang tao.
Nagbakasakaling tumawag siya. Walang sagot. Wala ngang tao! Ano kayang nangyari kay Jam?
(Itutuloy)
- Latest