Thompson, Durant bumandera para sa Warriors

LAS VEGAS -- Nagbida sina Klay Thompson at Kevin Durant para tulungan ang Golden State Warriors sa 112-107 panalo laban sa Los Angeles Lakers sa kanilang unang pagharap kay dating assistant coach Luke Walton.

Tumipa si Thompson ng magandang 9-for-13 fieldgoal shooting at tumapos na may 24 points, habang nagtala si Durant ng 7-for-11 clip para sa kanyang 17 markers.

Nagdagdag si Stephen Curry ng 14 points at may 13 si Patrick McCaw para sa Warriors, kinuha ang kanilang ikaapat na panalo sa limang presea-son games.

Hindi naglaro sina veteran forward Draymond Green at guard Andre Iguodala.

Pinamunuan naman ni Nick Young ang Lakers sa kanyang 17 points mula sa bench, samantalang may 15 markers si Fil-Am guard Jordan Clarkson.

Naglaro ang Lakers na wala si Metta World Peace at may 2-4 record sa preseason.

Sa Milwaukee, kumamada si Isaiah Canaan ng 25 points at nag-ambag ng 22 si Doug McDermott para ibigay sa Chicago Bulls ang 107-86 panalo kontra sa Bucks.

Nagdagdag si Nikola Mirotic ng 14 points kasunod ang 13 ni Jerian Grant para sa Chicago, may 3-2 card sa preseason.

Hindi pinaglaro ng Bulls sina Dwyane Wade, Rajon Rondo at Jimmy Butler ngunit nakamit pa rin ang ikatlong sunod na panalo.

Bumandera si Jabari Parker para sa Milwaukee (2-2) sa kanyang 21 points at may 14 si Giannis Antetokounmpo.

Sa Kentucky, tumipa si Andrew Wiggins ng 23 points, habang humakot si Karl Anthony Towns ng 16 points at 14 rebounds para banderahan ang Minnesota Timberwolves sa 101-96 panalo laban sa Miami Heat.

Umiskor si Gorgui Dieng ng 12 points, samantalang nagdagdag sina Nemanja Bjelica at Ricky Rubio ng 11 at 10 markers, ayon sa pagkakasunod, para sa ikalawang sunod na panalo ng Timberwolves sa apat na preseason games.

Pinangunahan ni Rodney McGruder ang Miami sa kanyang 15 points mula sa bench.

Ipinahinga ng Heat, natapos ang dalawang sunod na ratsada, sina Hassan Whiteside at Goran Dragic.