Booker mihimo’g kasaysayan, miiskor 70 puntos sa Phoenix

CEBU, Philippines - Ang tang-an nga guwardiya sa Phoenix  Suns nga si Devin Booker mikulit og kasaysayan human mipabuhagay og 70 puntos, apan wala makompleto ang iyang adlaw  human sila mapilde ngadto  sa Boston Celtics, 130-120 sa NBA kagahapon didto sa TD Garden sa Boston, Massachusetts.

Si Booker nahimo nga ikaunom nga player sa kasaysayan sa NBA nga nakatali og 70 puntos o sobra pa sa usa ka duwa, apan siya maoy labing bata sa edad nga 20-anyos.

Nakatabla sab siya sa ika-10 nga dapit sa listahan niadtong nakahipos sa labing daghan nga iskor sa usa ka duwa uban nilang Wilt Chamberlain, Kobe Bryant, Elgin Baylor, David Thompson ug David Robinson.

Si kinatibuk-an, si Booker mipasud og 21 sa 40 niya ka itsa, upat sa 11 ka pagsuway sa 3-point area ug duha lamang masipyat sa 26 ka free throws.

Sa laing duwa, ang Cleveland Cavaliers nakabawi dayon sa miagi nilang kaparotan batok sa Denver Nuggets ug ilang gipahimungtan mao ang Charlotte Hornets, 112-105 ubos sa pagpangu ni LeBron James.

Si James mitapos sa duwa uban ang 32 puntos, 11 ka assists ug siyam ka rebounds. Labaw sa tanan, gibati siya og tumang kalipay kay nakabangon dayon sila sa makapasagmuyo nga kaparotan batok sa Nuggets.

Didto sa Houston, si James Harden mipabuhagay og 38 puntos ug 17 ka assists sa dihang ang Rockets mipakaging sa New Orleans Pelicans, 117-107, samtang si Stephen Curry mikadlit og 27 puntos ug 12 ka assists alang sa Golden State Warriors nga mipaluhod sa Sacramento Kings, 114-100. (BANAT NEWS)