Olivia andam motrabaho sa Pilipinas

CEBU, Philippines - Gibutyag ni Miss Universe 2015 2nd runner-up  Olivia Jordan (Miss USA)   nga andam siya modawat   puhon og proyekto  dinhi sa Pilipinas gumikan kay  nahimuot siya  sa maayo nga batasan sa mga Pinoy.

Hinuon  hanap pa kini nga mahitabo karong tuiga gumikan kay duna pa siya'y nakalinya nga modeling projects  didto  sa Amerika ug isunod dayon niya ang Pilipinas kung sa higayon  maluag na ang iyang schedule.

Nasayran nga usa si Olivia sa mga behind-the scene sa  65th Miss Universe karong adlawa.  Ikaduha na kini nga higayon nga nakabisita  si Olivia sa nasud ug duol na kaayo sa iyang kasing-kasing mga Pinoy.

Suod kaayo nga higala  ni Olivia si Miss Universe 2015  Pia Wurtzbach. Nakatikang siya dinhi sa Pilipinas sa miaging tuig human siya gihimong hurado sa Binibining Pilipinas.

Mga sapot ni Pia ibaligya

Sa pagtak-op sa titulo ni  Pia Wurtzbach isip Miss Universe karong adlawa,  target niya nga ibaligya niya ang iyang mga dress ug  gown nga  gipang-gamit  niya sulod sa usa ka tuig.

 "After I step down as Miss Universe, I want to do an auction or a garage sale where I can hang and sell my dresses," saysay pa ni Pia ngadto sa ABS-CBN News.

Matud pa sa beauty queen nga naka-impake na ang iyang mga gamit  sa iyang apartment sa New York nga maoy nagsilbi niya nga official residence isip Miss Universe.

Moabot ngadto sa pito ka mga balik bayan box  ang gisudlan sa iyang mga gown nga gipanul-ob niya sa nagkadaiyang kalihokan nga iyang gitambongan.

"I'll put a tag on each dress so buyers will know where I wore that outfit to," dugang pa ni Pia.

Tungod sa  kalamidad nga nasugatan sa iyang  hometown sa  Cagayan De Oro,  target ni Pia nga  ang maong lugar maoy maka-benepisyo sa kita sa iyang gown.

"Since I didn't get to have a homecoming in my hometown, it will go to them," panapos pa ni Pia.  (BANAT NEWS)