Year of the Rooster

Bag-ong Tuig na gyud! Gisuwerte ko kay adunay bakante nga puwesto karong isyuha ug nakahigayon pa intawon pagsuwat og lindog. Maayo unta og malooy ang among editor-in-chief nga ibalik gyud ang Renbor Patrol aron kanunay ta nga mag-uban.

Ang ubang tawo nga matuo-tuohon miingon nga dili kuno maayo ang tuig 2017 kay “Year of the Rooster.” Maato ra kuno ang atong kinitaan kay sama sa manok nga magsige ra kuno og pangakha, dayon ang makit-an nga pagkaon iyang kan-on.

Buyno, kun magtinapolan, ingon gayud niana ang mahitabo. Pero, angkunon nako nga lisud gayud ang panahon karon kay bisan gani ako nga nag-sideline pa sa pagtrabaho og radio station, naglisud ang kahimtang. Tingali, daghan pa ang mas labaw nako kakabus.

Kun nagkugi man kita sa tuig 2016, dugangan pa nato ang atong kagugi karong tuiga, ug unta menosan ang gasto nga dili kay molabaw pa sa atong makita kada adlaw.

* * *

Nangandoy gyud unta ko nga karong tuiga, menosan na unta sa atong mga politiko, ilabi na dinhi sa dakbayan sa Sugbo, ang pagpamolitika kay ang paghimo niini moresulta ra nga walay maayong serbisyo nga mahatag ngadto sa katawhan.

Dili man ikalimod nga grabe kaayo ang pagpamolitika sa atong mga opisyal. Kun dunay usa ka proyekto nga gustong himoon sa administrasyon ni Mayor Tomas Osmeña, supakon gyud kini sa mga alyado sa Team Rama.

Unya, kun ang mga alyado sa Team Rama sab ang adunay mga gusto nga buhaton, dili usab kini suportahan sa administrasyon. Ang nindot gyud unta mao nga kun maayo ang tumong sa paghimo og proyekto dili kini supakon.

Ang resulta, daghang mga angay’ng himoon unta nga wala na hinoon matagad.

* * *

Akong daygon ang mga sakop sa Philippine Drug Enforcement Agency (PDEA) kay ubos sa pagdumala ni Regional Director Yogi Felimon Ruiz daghan na kaayo sila og maayong kalampusan.

Dili sama kaniadto, sa pagdumala niadtong gipulihan ni Ruiz, nga kanunay ra gyud nako nga gisaway nga nagkyugpos ra sa ilang mga bukton ug makapaduda na hinoon nga nagdawat sila og payola gikan sa mga drug lord aron dili himoan og kampanya ang ilang negosyo pagpamaligya og drugas.

Bi, unsa may kalainan kaniadto ug karon? Ngano nga wala may kalampusan ang PDEA kaniadto? Ngano nga nindot man og kalampusan ang PDEA karon? Kaniadtong miaging Biyernes, kapin sa duha ka kilo nga shabu ang nasakmit nila didto sa Carcar.

Mabasol ba kun magduda ang katawhan nga ang mga sakop sa PDEA nagdawatan og payola gikan sa mga drug lords kaniadto?