Way signal ug klase sa Lapu-Lapu

CEBU, Philippines - Walay signal karong adlawa ug wala say klase ang tanang level sa eskuylahan gawas lamang sa kolehiyo sa tibuok Dakbayan sa Lapu-Lapu tungod sa ipahigayon nga Miss Universe Swimsuit Competition didto sa Jpark Island Resort and Waterpark.

Si Mayor Paz Radaza mimando kagahapon nga di magklase ang primary, elementary and secondary nga mga public schools kagahapon.

"The suspension of classes in the primary, elementary, secondary private schools in the City of Lapu-Lapu which is hereby encourage, is submitted to their discretion in accordance to their respective rules and authorities," matud sa memo ni Radaza.

Si Police Chief Inspector Junnel Caadlawon, chief of operations sa Lapu-Lapu City Police Office nagkanayon nga temporaryong tangtangon ang signal sa mga cell phones alang sa paglikay og mga hulga sa seguridad.

Ang maong lakang gimando ni Police Regional Office -7 Director ug Chief Superintendent Noli Taliño mitataw nga i-shutdown ang cell sites sa maong siyudad sugod sa alas 4 sa buntag hangtud ugmang adlawa.

Matud pa ni Taliño kini aron masiguro ang seguridad sa maong dapit. Hinuon human makahuman na sa kalihokan ang mga kandidata ibalik ra sab dayon ang signal sa mga dapit.

Ipatuman usab ang "no fly zone" ug "no sail zone" sa mga dapit  duol sa mga kalihokan.

Kauban sa sakop sa kapulisan  ang mga sakop sa Philippine  Coast Guard, Philippine Navy ug maritime police diin 24 oras sila nga magbantay sa kadagatan.

Ang siyudad sa Lapu-Lapu lang ang maapektuhan niini ug walay labot ang Dakbayan sa Sugbu.

Ang Dakbayan sa Sugbu lakip na ang mga piniling lugar sa dakbayan sa Mandaue ug Lapu-Lapu, gitangtangan sab og cellphone signal tibuok adlaw alang sa Sinulog activities sama sa fluvial ug solemn procession pag Enero 14 ug Sinulog Grand Parade pag Enero 15.

Si Caadlawon  miingon nga may koordinasyon sa National Telecommunications Commission ug mismong ahensya ang magpahibaw sa publiko bahin sa pagpawong sa signal.

Ang Smart Communications mipadala na og advisory kalabot niini.

Adunay  300 ka police nga i-deploy sa LCPO ug dugangan pa gikan sa PRO-7, Air Force, Navy ug uban pang force multipliers, matud ni Caadlawon.Christell Fatima Tudtud ug Jojo Ugdol (BANAT NEWS)