Kapin gatos ka pasahero wa makabiyahe tungod sa bawod

CEBU, Philippines - Sobra sa usa ka gatos ka mga pasahero ang na-istranded sa Toledo City Port Terminal kagahapong adlawa.

Wala makabiyahe ang maong mga pasahero human gi-kanselar ang mga biyahe sa fastcraft ug barko paingon sa San Carlos City sa Negros Occidental tungod sa dagkung bawod.

Dili momenos sa 10 ka biyahe sa fastcraft ug barko sa Lite Shipping Company ug Fastcraft ang kanselado ang biyahe.

Ang ubang mga pasahero gikan pa nitambong sa Sinulog Grand Parade sa dakbayan sa Sugbo ug mopauli na unta sa San Carlos City ug uban pang bahin sa isla sa Negros.

Nagpaabot ang mga shipping company sa abiso gikan sa Coast Guard Toledo City Detachment  sa pagpabalik sa biyahe sa mga sakyanang pandagat.

Samtang pipila usab ka mga barangay sa siyudad sa Toledo ang gibahaan tungod sa kusog nga uwan.

Lakip sa lugar nga gibahaan mao ang pipila ka mga dapit sa Barangay Calong-calong, Matab-ang ug uban pa.

Aduna say natala nga ginagmay nga pagdahili sa yuta sa Barangay Pangamihan, Media Once ug Ilihan.

Gikanselar usab ang klase sa elementarya ug sekondarya sa pampublikong tunghaan sa Toledo subay sa deklarasyon sa Kapitolyo. (BANAT NEWS)