Padayong suporta sa konseho panghinaut ni Eddiegul

CEBU, Philippines - Gipanghinaut ni Talisay City Mayor Eduardo Gullas nga magpadayon gihapon ang suporta sa iyang konseho aron mas daghan pa nga mga proyekto ang ilang mapatuman sa dakbayan.

Atol sa iyang State of the City Address (SOCA), si Gullas nipaabot sa iyang pasalamat sa konseho tungod kay padayon kini nga niuyon sa tanan niyang mga proyekto para sa katawhan.

“I have no complaints with the council because they are all cooperative,” matud ni Gullas.

Ang konseho gidominar sa iyang partidong Alayon diin si Konsehal Valeriano Ylanan lang ang gikan sa laing partido nga nakadaug sa niaging eleksiyon.

Si Ylanan ang nitahud gyud dayon sa Alayon human sila nihural isip mga opisyal sa Talisay.

Asoy ni Gullas nga nalipay ra sab siya ni Ylanan tungod kay nisuporta kini sa iyang mga proyekto.

Dugang pa niya nga unta sa mosunod nga mga tuig magpabilin ang ilang suporta.

Nadungog nga masiak ang ilang grupo human ilang gihukasan si Konsehal Doroteo Emit og komitiba sa urban poor. Si Emit ang nagpabilin lang una nga nagpakahilom ug wala pa mobuhi og pamahayag labot niini. - /GMR) (BANAT NEWS)