Pau Gasol pabilin sa Spurs

Miuyon na si  Pau Gasol sa tulo ka tuig nga kontrata aron magpabilin sa San Antonio Spurs.

Wala hinuon gibutyag kon pila ang suholan nga madawat sa 37-anyos nga Espanyol uban sa Spurs hangtod sa 2020 season.

Si Gasol nga kaunom namiyembro sa NBA All-Star, anaa na karon sa ika-17 niya nga season sa liga. Mi-average siya og 12.4 points, 7.8 rebounds, 2.3 assists ug 1.1 blocks sulod sa 64 ka duwa sa miaging season diin ang Spurs mihimo sa ikaduhang labing nindot nga 61-21 record sa regular season sunod sa Golden State Warriors.

Wall Pader gihapon sa Wizards

Duna gihapo’y usa ka lig-on nga pader ang Washington human gipahibawo ni John Wall nga mipirma siya og upat ka tuig nga ‘contract extension’ uban sa Wizards nga mibalor og $170 million.

Ang 26-anyos nga si Wall mirehistro og career-high average sa puntos (23.1), assists (10.7) ug steals (2.0) sulod sa 78 ka duwa sa miaging season nga maoy iyang ikapito sa NBA.

Siya lamang ug si Russell Westbrook sa Oklahoma City Thunder ug James Harden sa Houston Rockets ang mga player nga dunay average nga 20 points ug 10 ka assists sa miaging season.