10th Emil’s Cup kasado na
CEBU, Philippines - Andam na ang tanan alang sa ika-10 nga edisyon sa tinuig nga Emil’s Fresh Chicken Cup Inter- commercial basketball tournament nga mosikad karong Hulyo 29 diha sa Minglanilla Sports Complex.
Atol sa final meeting nga gipasiugdahan ni league organizer Mickey Oberes sa Cebu Grand Convention Center kagahapon, nauyonan sa mga hingtungdan nga ang matag team langkoban og 20 ka players, apan 15 lang ang mahimong makaduwa.
Ila sab nga nasabotan nga wa’y import o langyaw nga magduduwa ang tugotan nga makaduwa.
Sa kinatibuk-an, unom ka teams ang magtigi ning usa ka semanang torneyo nga modugang og lamas sa selebrasyon sa pista sa Barangay Linao-Lipata agi’g pagtamod sa minahal nilang patron nga si Sr. San Roque.
Ang mga entrante gibahin sa duha ka grupo apan mag-abot gihapon silang tanan subay ang single round-robin format atol sa eliminasyon.
Ang two-time defending champion Team Samsam Gullas, Riss Lending/Eagles Express ug San Remigio Properties naglangkob sa Bracket A, samtang ang Aspa Scaffoldings, Fighter Wine Fighter 50 ug SG-ARQ Builders ubos sa Bracket B.
Ang top 2 teams matag bracket maoy mag-engkuwentro sa crossover semifinals. Ang mga mananaog magsangka dayon alang sa titulo, samtang ang mga pildero mag-ilog sa ikatulong puwesto.
Ang makampiyon mobulsa og P110,000, samtang ang mopahiluna sa ikaduha ug ikatulong dapit modawat og P50,000 ug P30,000. Duna sa’y special awards alang sa MVP ug Mythical Five. (BANAT NEWS)
- Latest
