2 Coops sa Argao gi-accredit sa Kapitolyo
CEBU, Philippines - Gi-accredit na sa Kapitolyo ang duha ka kooperatiba sa mga mag-uuma sa Lungsod sa Argao. Kini mao ang Mandilikit Multi-Purpose Cooperative sa Barangay Mandilikit ug Pestales Agriculture Cooperative sa Candabong, Binlod sa maong lungsod.
Si Bokal Sun Shimura, chairman sa committee on accreditation sa hunta probinsiyal ang niduso sa rekomendasyon nga aprobahan ang aplikasyon sa duha ka kooperatiba human nakakompleto sa mga gikinahanglang dokumento. Sila si Bokal Jose Mari “Tata” Salvador ug Edsel Galeos sa ikaduhang distrito sa Probinsiya sa Sugbo diin nasakop ang Argao nipadayag sa ilang kaandam sa pagsuporta sa maong mga kooperatiba.
Ang Mandilikit MPC nga adunay 57 pa ka sakop nga mag-uuma ang unang higayon pa nga nagpa-accredit sa Kapitolyo sa pamasin nga mahatagan sila og mas dako-dako nga hinabang.
Ang PESTALES nga nagpasabot og People’s Empowerment through Social, Technological, Active, Livelihood, Economic Services ang kapin pa sa usa ka tuig sukad natukod ug gilangkuban sa 60 ka batan-on. (BANAT NEWS)
- Latest