Suspek sa pulis slay at testigo, itinumba
BATANGAS , Philippines - Patay ang 40-anyos na lalaking iniuugnay sa pagpatay sa pulis at isang saksi matapos itong pagbabarilin ng mga hindi pa kilalang kalalakihan sa Tanauan City, Batangas kamakalawa.
Kinilala ang napatay na si Michael Carandang ng Barangay Darasa at sinasabing pangunahing suspek sa pagpatay kay SPO1 Wilfredo Luna at testigong si Jose Madrigal Nepomuceno.
Batay sa talaan ng pulisya, si Carandang ay kabilang sa high value target dahil sa mga kasong droga at illegal na baril.
Ayon sa police report, sakay ng Toyota Corolla (THM-555) ang biktima habang nakaparada sa kahabaan ng Castillo Street sa Barangay 5 nang biglang lapitan at ratratin ng dalawang hindi kilalang lalaki na lulan ng puting kotse na may plakang TKD-528 bandang alas-3:30 ng hapon.
Isinugod pa sa ospital si Carandang pero idineklarang patay sa emergency room.
Narekober naman sa bulsa ni Carandang ang cal.45 pistol at dalawang plastic sachet na shabu.
- Latest
