Good move ang Mahindra

MANILA, Philippines - Tama lamang ang naging desisyon ng Mahindra dahil kaagad nakahugot ng kontribusyon ang Floodbuster mula sa mga bagong hugot na sina Glenn Khobuntin at Eric Camson para talunin ang Blackwater Elite, 96-87 at buhayin ang kanilang pag-asa sa 2017 PBA Commissioner’s Cup kagabi sa Smart Araneta Coliseum.

Nag-ambag si Khobuntin at Camson, nanggaling sa NLEX bilang bahagi ng trade kamakalawa sangkot si Alex Mallari ng 15 at 9 points, ayon sa pagkakasunod para sa 2-7 baraha ng Mahindra katabla ang Blackwater.

“We felt the togetherness of these guys going into these guys was a high-value asset for us winning this game,” sabi ni head coach Chris Gavina kina Khobuntin at Camson. “We just committed to each other.”

Matapos maagaw ng Elite ang third period, 70-68 ay nag-init naman ang opensa ng Floodbuster para iposte ang 12-point lead, 91-79, galing sa jumper ni point guard LA Revilla sa huling 4:33 minuto ng fourth quarter.

Ang naturang kalamangan ang sinandalan ng Mahindra para igupo ang Blackwater at tapusin ang kanilang limang sunod na kamalasan.

Pinamunuan ni Reden Celda ang Floodbuster sa kanyang team-high na 18 points at 4 assists, habang humakot si import Keight Wright ng 16 markers, 16 rebounds at 3 shotblocks. Kumolekta naman si reinforcement Greg Smith ng 29 points, 25 boards at 6 assists para pangunahan ang Elite kasunod ang tig-11 markers nina Nino ‘KG’ Canaleta at Kyle Pascual.

MAHINDRA 96 - Celda 18, Wright 16, Khobuntin 15, Camson 9, Paniamogan 8, Corpuz 8, Caperal 6, Revilla 4, Ballesteros 4, Teng 3, Yee 3, Salva 2, Elorde 0.

Blackwater 87 - Smith 29, Canaleta 11, Pascual 11, Digregorio 9, Cruz 9, Sena 7, Sumang 4, Gamalinda 4, Aguilar 2, Banal 1, Buenafe 0, Pinto 0.

Quarterscores: 25-26; 48-48; 68-70; 96-87.