Pagduot sa iwit
Samtang gitun-an nilang Labor Secretary Bebot Bello ang kahigayonan sa pag-awhag sa Kongreso pagpanday og balaudnon alang sa nasudnong uminto sa minimum nga suholan, mao ni ang laksot nga kamatuoran: Sa pag-abot sa Labor Day 2017, niburot ngadto sa P226 ang kang-a tali sa labing taas ug labing ubos nga minimum nga suholan sa Pilipinas.
Ang labing taas nga inadlaw nga minimum nga suholan, P491, maoy gidawat sa mga trabahante sa Metro Manila. Samtang ang ubos nga minimum nga suholan, P265, maoy gidawat sa mga mamumuo sa Autonomous Region in Muslim Mindanao (ARMM).
***
Dihang gitukod sa Kongreso 28 ka tuig nang nilabay ang National Wages and Productivity Commission (NWPC) aron mao'y motuman sa ilang tahas pagtakda sa suholan sa nagkalainlaing rehiyon sa nasud pinaagi sa Regional Tripartite Wages and Productivity Board (RTWPB), wa g'yud tingali magtinguha ang mga magbabalaod paghimo og kahimanan pagduot sa nangiwit nang daan.
Labaw na tingaling way nagdahom nga moabot ang adlaw nga malansang sa labing ubos nga ang-ang ang suholan sa labing kabos nga rehiyon kansang mga anak sa singot igo lang maglaway sa pagsutoy sa suholan sa labing adunahan nga rehiyon.
***
Samtang di sama kabiya sa ARMM, ang minimum nga suholan sa Sugbo nga P366 nag-anam sab kalayo sa suholan sa Metro Manila. Ang inadlaw’ng kita sa labing kugihan nga minimum wage earner sa Sugbo kanunayng malabwan og P125 sa labing tapolan niyang katugbang sa Manila.
Nga mas dakong inhustisya atubangan sa pagkabisto sa mga pagtuon nga kon itandi sa Manila, ang Sugbo mas taas og cost of living, mas mahal ang inadlaw’ng palaliton ug katunga rang purchasing power.
***
Nituyhakaw sang inhustisya sa Central Visayas. Ang P366 para lang sa mga trabahante sa mga dakbayan Cebu, Carcar, Danao, Lapu-Lapu, ug Mandaue, ug mga lungsod sa Liloan, Minglanilla, ug San Fernando.
P333 ray minimum nga suholan sa mga dakbayan sa Toledo ug Bogo ug ubang kalungsoran sa mainland sa Sugbo. Mas ubos ang ilang tan-aw sa taga Bohol ug Negros Oriental kay P323 rang minimum, samtang ang taga Siquijor ug mga isla sa Bantayan ug Camotes tag P308. Nga labaw hinuon gihapon og P43 kay sa ARMM.
- Latest
