Warden giilisan kay drugas nagpadayon

CEBU, Philippines - Gihulipan sa iyang katungdanan isip warden sa Talisay City Jail si JCInsp. Josephus Jelianggao human masuta nga nagpadayon gihapon ang pagpalusot sa ilegal nga drugas sa maong bilangguan.

Kasamtangang gidestino karon si Jelianggao sa regional office sa Bureau of Jail Management and Penology samtang ang nipuli kaniya mao si JCInsp. Dennis Aliño nga kanhi hepe sa legal ug hearing officer sa BJMP-7.

Kahinumduman nga sa miaging buwan, nakasikop sila si Jelianggao og dalaw nga adunay drugas nga suway nga ipasulod sa maong prisuhan. Apan bisan pa man sa ilang ka istrikto, pabilin silang nalutsan og mga kontrabando.

Gani niadtong miaging Lunes, adunay gihimo nga greyhound operation ug aduna gihapo’y nakit-an nga ilegal nga drugas sulod sa maong pasilidad.

Gawas sa drugas, aduna say nakuhang mga drug paraphernalia, lain-laing gadgets ug aduna sa’y mga kubol-kubol nga unta dugay na kining gidili.

Sa pagsuwat niining balita, wala pa motubag si Jelianggao kalabot sa pagrelibo kaniya. - /DILT) (BANAT NEWS)