Comelec di na basta-basta mohatag og impormasyon

CEBU, Philippines - Gipahibawo sa Commission on Elections sa Dakbayan sa Talisay nga dili na sila basta-basta makahatag og impormasyon sa usa ka botante.

Matud ni Efren Arnejo Jr., Comelec assistant officer sa siyudad, nga dili na sila motugot o mohatag diha-diha sa impormasyon sa usa ka botante ilabi na kung wala’y authorization sa tawo nga iyang gikuhaan sa iyang profile.

Iyang gipasabot nga kun aduna man gani authorization ang tawo nga moduol sa ilang buhatan ila kini pangitaan og identification card (ID) aron maseguro gyud nga siya maoy gisugo. Ang ilang implementasyon niini gisugdan human sa ilang general assembly sa niaging semana labot sa “Data Privacy Law”.

Asoy pa niya nga mahimo sila nga responsable kun aduna may mogawas nga impormasyon sa usa ka botante maong doble ang ilang pagmatngon.

Nasayran nga na-hacked sa usa ka programmer ang website sa Comelec sa niaging tuig nga maoy butang nga sila nagmainampingon na sab. - /GMR) (BANAT NEWS)