Pagkawot og tabay gidili gyud
CEBU, Philippines - Gipahimangnuan sa Metropolitan Cebu Water District ang publiko sa dili pagkawot og tabay ug sa pagkuha og groundwater sa ilegal nga pamaagi.
Si Jorge Gabriente, ang MCWD acting assistant general manager for operations, nagkanayon nga tungod sa nagkagrabeng saltwater intrusion sa aquifer sa Sugbo, ang pagkawot og mga tabay gidili sa National Water Resources Board (NWRB) diin giimplementar ang moratorium sa pagluwat og water permits.
Kini naglangkub sa tibuok Mactan Island, Barangays Day-as, Mabolo ug Lahug sa Cebu City; Barangays Looc, Guizo, Tipolo, Paknaan ug Cabancalan sa Mandaue City ug barangays Jubay, Cotcot, San Roque ug Estaca sa Liloan.
Sa pagtuon sa Japan International Cooperation Agency niadtong 2010 nagbutyag nga kung magpadayon ang kasamtangan nga lebel sa water extraction, ang saltwater intrusion gituohan nga maabot kini sa inland ngadto na paingon sa foothills sa Talamban, Cebu City sa tuig 2030.
Tungod sa maong pagtuon, ang MCWD, kinsa nagsalig sa groundwater isip tinubdan sa ilang suplay sa tubig nagsugod na og gamit sa surface water sources.
Matud pa ni Gabriente nga ang mga private well developers nga buot magkawot og tabay gikinahanglan nga mangayo og permit sa NWRB.
Ang mag-operate og ilegal nga tabay pwede kini mamultahan sa NWRB og P800 ngadto sa P1,000 kada adlaw nga violation ug pwede sab ipahunong ang maong ilegal nga operasyon. - /GMR) (BANAT NEWS)
- Latest
