Kanhi mayor Michael Rama magkonsehal?

CEBU, Philippines - Si kanhi mayor Michael Rama dili mamugos nga modagan siya pagbalik pagka mayor dinhi sa dakbayan sa Sugbo kun dili gusto ang iyang mga kauban sa partido, ug andam gani kini nga molansar bisan og konsehal kun maoy mauyonan sa ilang grupo.

Gibutyag ni Konsehal Raymond Garcia nga ang kanhi mayor nakigtigum kanila sa miaging semana gikan sa udto hangtod na sa gabii ug daghan kaayo sila og gihisgotan, apil na ang isyu kun makig-atbang pa ba kini batok kang Mayor Tomas Osmeña sa sunod nga eleksiyon.

Matud ni Garcia nga si Rama miingon nga wala siya mahadlok nga makigsangka pagbalik ni Osmeña tungod kay ang iyang pagtuo nga siya gyud ang midaog sa miaging eleksiyon, apan dunay pipila sa iyang kaalyado nga konsehal nga miangkon nga mas bentaha nga mangita sila og laing kandidato nga iatbang kang Osmeña.

Si Garcia misaysay nga si Rama mibutyag nga mahimo ra siya nga modagan pagka bise mayor, pagka kongresista sa south district, o kaha konsehal sa dakbayan, kun maoy kabubut-on sa iyang mga        kauban.

Bisan si Presidential Assistant for Visayas Michael Lloyd Dino walay tinguha nga mosuporta kang Rama kun makahukom kini nga magpapili pag-usab pagka mayor, kay tinguha ni Dino nga si Vice Mayor Edgardo Labella maoy iyang suportahan.

Gihulagway ni Diño nga si Labella walay isyu ug wala gyud malambigit og mga anomaliya sukad-masukad. Si Mayor Osmeña sa iyang bahin, miingon nga wala gyud siya mabalaka kun si Dino mosuporta sa iyang ikakontra nga kandidato kun pananglit makahukom siya nga magpapili pag-usab pagka mayor.

Si Osmeña gideklarar nga mananaog sa miaging eleksiyon tungod kay gibiyaan niya si Rama og kapin sa 34 mil botos, apan si Rama miprotesta sa resulta sa piniliay. (BANAT NEWS)