Durant mobalik na’g duwa
CEBU, Philippines - Mas kahadlokan na sab unya ang Golden State Warriors nunot sa pagbalik sa star forward niining si Kevin Durant gikan sa injury.
Gitaho sa ESPN kagahapon nga si Durant, kinsa wala na makaduwa tungod sa knee injury nga iyang naangkon niadtong Pebrero 28, posibleng moduwa na og balik karong Sabado (Domingo sa Pilipinas) sa dihang ang Warriors makigsangka batok sa New Orleans Pelicans didto sa ilang balwarti.
Gikompirmar usab kini ni Warriors coach Steve Kerr.
“Hopefully we can get him in for a couple of regular-season games,” matud pa ni Kerr.
Igo lamang niya gikataw-an ang mga espekulasyon nga maguba lang unya ang ilang momentum kun ugaling mobalik na si Durant sa ilang line-up. Bisan og wala si Durant, hapsay gihapon ang dagan sa opensa sa Warriors ug balanse kanunay ang ilang ataki inabagan sa ilang mga reserve players.
Apan gitataw ni Kerr nga dili siya magpanuko nga ipaslak dayon sa ilang starting line-up si Durant kun ugaling tugtan na kining makaduwa og balik. (BANAT NEWS)
- Latest