Arum mihatag og katin-awan

CEBU, Philippines - Gibutyag ni Top Rank chairman Bob Arum nga aduna na’y nakaplastada nga kontrata alang sa away tali nilang WBO welterweight champion Manny Pacquiao (59-6-2, 38KOs) ug ni Jeff Horn (16-0-1, 11 KOs) nga tentatibong gitakda karong Hulyo 2 didto sa Australia.

Apan iyang giklaro nga wala siya’y gihatag nga deadline aron kini pirmahan sa duha ka kampo.

“There is no deadline,” matud pa ni Arum sigun sa taho ni Steve Kim sa boxingscene.com agi’g pagsalikway sa nahaunang mga balita nga duna siya gitakda nga petsa kanus-a niya gusto pirmahan ni Pacquiao ang kontrata.

Kun siya maoy pasultion, han-ay na ang tanan alang ni Arum. Duna lang sila’y gagmay’ng mga butang nga giplansa aron mahingpit na ang tanan.

Si Pacquiao nakigsabot-sabot og balik alang sa away batok ni Horn human madiskarel ang gipasiatab nga $38 million bout nilang Amir Khan didto sa Dubai, United Arab Emirates.

Batok ni Horn, si Pacquiao gibana-bana nga mokita og sobra sa $5 million nga maoy pasiunang tanyag kaniya sa Duco Events, ang promoter sa wa’y pildeng Australyano nga kanhi Olympian. (BANAT NEWS)