Bangkay ng ginang na naaagnas nadiskubre
MANILA, Philippines - Isang bangkay ng ginang na nasa state of decomposition ang nadiskubre ng kanyang mga kapitbahay na nakaamoy ng nakakasulasok na amoy mula sa bahay nito sa Barangay Little Baguio, San Juan City.
Batay sa ulat, dakong alas-10:30 ng umaga nang madiskubre ang bangkay ng biktimang si Necitas Tan, nasa hustong gulang, sa loob ng kanyang bahay na matatagpuan sa 294 Jose Abad Santos St., Barangay Little Baguio.
Nauna rito, nakaamoy umano ng masangsang ang mga kapitbahay ng biktima mula sa bahay kung saan mag-isang naninirahan si Tan kaya’t kinatok ngunit wala namang sumasagot.
Naghinala ang mga kapitbahay na may masamang nangyari kay Tan, kaya’t kinontak nila ang anak nitong si Veronica Paredes, na siya namang humingi ng tulong sa mga pulis.
Pagdating ng mga pulis sa bahay at binuksan ang bahay ay bumulaga ang naaagnas na bangkay ng biktima.
Sa ulat ng Scene of the Crime Operatives (SOCO), posibleng may limang araw nang patay ang biktima dahil sa pagkaagnas na ng katawan nito.
- Latest