Kaso batok duha ka bise mayor gibasura

CEBU, Philippines - Gibasura sa buhatan sa Ombudsman-Visayas ang kasong kriminal batok sa duha ka kanhi bise mayor ug usa ka utility worker sa Lungsod sa Sogod, Probinsiya sa Sugbo.

Ang Field Investigation Office of the Office of the Ombudsman (Visayas) ang nisang-at sa kaso batok nilang kanhi bise mayor Dean Severo Dosado ug Nicasio Bacayo, ug Ziya Dosado tungod sa giingong unliquidated cash advances sukad niadtong 2008.

Ang kaso gibase sa suwat sa usa ka Dominico Moneva kinsa nipasangil nga si Dean adunay unsettled cash advances nga P81,328.76; kang Zita P20,804.50 ug kang Bacayo P29,941.59.

Kini base usab sa summary of cash advances and liquidation/refund nga giduso sa acting municipal accountant nga si Erlita Montecalvo.

Si Bacayo sa iyang counter-affidavit niingon nga ang cash advance nga P11,119 alang sa opisyal niya nga biyahe niadtong 2011 nakanselar tungod sa dautang panahon ug nakapresentar sab siya og mga dokumento nga liquidated na ang maong kwarta. Sila si Dean ug Zita ang wala mosang-at og counter-affidavits.  Matud ni Graft Investigation and Prosecution Officer I Rheia Tibon nga wala magtakdo ang mga dokumento nga gibasehan sa reklamo ni Moneva samtang nakakuha usab og general clearance si Bacayo niadtong Nobiyembre 4, 2015 nga wala na siyay tulubagon sa kwarta sa gobiyerno.

Ang kaso ni Dean ug Zita gibasura tungod kay nilapas na sa panahon ang pagpasaka ni Moneva sa reklamo samtang kang Bacayo ang nasuta sab nga walay igong basehanan. (BANAT NEWS)